Гогул ширкитиниң җуңгодин чекиниши бир дәврниң бәлгиси болуп қалдиму?

"Вашингтон почтиси гезити"дә елан қилинған "гогул ширкити вәқәси чәтәл ширкәтлириниң җуңгоға қаратқан позитсийисиниң өзгәргәнликини гәвдиләндүрди" мавзулуқ мақалини бүйүк ера тор битиниң мухбири тәрҗимә қилип 3 - айниң 25 - күни бүйүк ера тор битидә елан қилинди.
Обзорчимиз сидиқ һаҗи рози
2010.03.26
Гогул ширкитиниң җуңгодин чекинишни қарар қилиши бир сигналдин учур тарқатти, 20 - әсирниң ахирқи дәвридики бүйүк иттипақ: ғәрб капитализми билән бейҗиң мустәбит түзүминиң бирлики һазир дәл бурулуш нуқтисида турупту" дәйдиған сигнални тарқатти. "Вашингитон почтиси гезити" хәвәр қилип мундақ көрсәтти: "җуңгониң рәһбәрлири һәптиниң 2 - күни гогул вәқәси пәқәт айрим бир иш, җуңгониң ишикни ғәрбкә ечивитиш сияситигә вә базар йетәкчиликидики ислаһат һәрикитигә тәсир йәткүзмәйду, деди. Бирақ, ғәрб карханичилири,гогул вәқәси америка, яврупа ширкәтлири билән коммунист һакимийәтниң алақилишиш усулиға итайин чуңқур өзгириш елип кәлди, ениқ ейтқанда ғәрб ширкәтлири бейҗиңға зәрбә беришкә башлиди", дәп көрсәтти.

Гепимизгә келәйли, дөләт билән дөләт оттурисида мунасивәт ялғуз сода - тиҗарәт мунасивити биләнла чәкләнмәйду. Дөләтләр ара сода - тиҗарәт мунасивәтлириниң муқимлиқиға даим дегүдәк капаләт қилалмиғандәк, дөләт билән дөләтләр оттурисидики сияси, дипломатик мунасивәтләр ниң муқимлиқиғиму һәмишә дегүдәк капаләт қилғили болмайду.

Дөләт билән дөләт оттурисидики сода - тиҗари мунасивәтләр, дөләт билән дөләт оттурисидики сияси дипломатик мунасивәтләргә қандақ тәсир көрситиду дәп соал қойғандин көрә, аввал дөләт билән дөләт оттурисидики сияси, дипломатик мунасивәтләр, сода тиҗари мунасивәтләргә қандақ тәсир көрситиду дәп соал қоюш керәк. Чүнки, материялизимчилар ейтқандәк, сиясәт иқтисадниң мәркәзләшкән падисидур.

"Хәлқара сиясәт башқа һәр қандақ сиясәтләргә охшаш һоқуқ қоғлишидиған күрәштур. Хәлқара сиясәтниң әң ахирқи мәқсити немә болушидин қәтий нәзәр, һоқуқ хәлқара сиясәтниң бивастә нишани булуп қеливериду"[ " дөләтләр ара сиясәт" аптор и морган тәв - америка ]

Йеқиндин бери "америкидин өтүп кетиш" яки "10йил ичидә америка билән үзәңгә соқуштуруш" дәйдиған гәп - сөзләр хитай мәтбуатлирида арқа - арқидин көзгә челиқидиған болуп қалған иди. 2008 - Йили 1 - айда хитай көрәңлири атмосферадики сүний һәмраһни ракета билән уруп чүшүрүп өзини көрситип қойғандәк болди. Кона гәпни тәкрарлисақ,копенһаген йиғинида җуңголуқ көрәңләр өзини көрситип, йиғинниң низамнамә имзалишиға сәлбий тәсир көрсәтти. Президент обама һөкүмити барлиқ тиришчанлиқини шқа селип 2009 - йили бир йил дегүдәк, җуңго, америка мунасивитини техиму яхшилашниң койида һәтта кишилик һоқуқни тәкитләшниму суслаштуруп қойди. Бундақ ақиланә сиясәткә җавабән хуҗинтав, 2009 - йили 9 - айниң 23 - күни нюйорк шәһиридә президент обама билән көрүшкәндә "җуңго, америка оттурисидики назук мәсилиләрни мувапиқ бир тәрәп қилиш тоғрисида " президент обамаға һәйдәкчилик қилған.

Немә болди? президент обама өткән йили 11 - айда һәтта далай ламани қобул қилишниму кечиктүрүп, бейҗиңни зиярәт қилип қайтип кәлгәндин кейинла, америка, җуңго мунасивити сүркилишниң доқмушиға келип қалди. Йеқинда президент обама "америка һәргиз 2 - дөләт болмайду" дәп көрсәткәндә, бу җаваб президентниң еһтимал хитайниң көрәңликигә қайтурған җаваби болса керәк.

"Вашингтон почтиси гезити" ахирида " чәтәлликләр җуңгода сода - тиҗарәт қилиши мумкин. Бирақ,сияси системиға пүкүлүп тазим қилишниң, немә десә һәә, мақул дейишниң зөрүрийити йоқ дәп көрсәтти.

Юқиридики аваз улинишидин бу обзоримизниң тәпсилатини аңлайсиләр.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.