Әмәлдарлар 'шинҗаң'ға топланди, немә һәрикәт йүз бериши мумкин?

5 - Айда ечилидиған "шинҗаң хизмәт йиғини" ечилмай туруп, хизмәтниң конкрет түрлири бекитилмәй, елан қилинмай туруп, рәһбәрлик гуруппилири, хизмәт гуруппилири, иҗра қилғучилар тәйинләнмәй туруп, туюқсизла мәркәз дәриҗилик хитай кадирлири худди чүмүлидәк мустәмликә уйғуристанға йүрүш қилди. Әйни чағда қорал көтүрүп таҗавуз қилип киргән генерал ваң җинниң дала армийисиму бу дәриҗидә һәйвәтлик йүрүш қилип, шу дәриҗидә һәйвәтлик һекайиләрни қалдурмиған иди.

Бейҗиң шәһәрлик парткомниң секретари лю чи,гуаңдуң өлкилик парткомниң секретари ваң яң ‏ - бир мәнидин ейтқанда, 2009 - йили 6 - айниң 26 - күни гуаңдуң шявгүән вәқәсини пиланлиған киши, лявниң өлкилик парткомниң секретари ваң ку қатарлиқ мәркәз дәриҗилик рәһбәрләр мустәмликә уйғуристанға топланди, пәқәт ху җинтав билән вен җиябавла җуңнәнхәйни сақлап қалди. яқ! юқири дәриҗилик рәһбәрлирини мустәмликә "шинҗаң"ға йолға селиветипла ху җинтавниң америкиға хәлқара йиғинға кәлгәнлики, толиму рошәнлик ичидә интайин мәнилик селиштурма болуп қалди.

Бу рәһбәрләрниң һәммиси дегүдәк җәнубий уйғуристанға топланди. Бейҗиң шәһири, җеҗяң өлкиси хотән өлкисигә мәсул болди.

Гуаңдуң өлкиси қәшқәр өлкисини көтүрә алди. Җяңши өлкиси қизилсуға ярдәм бәрмәкчи болди вәһаказа. Булар уйғур юртлириға ярдәм берип немә иш қилмақчи? булар уйғур юртлириға мәсул болуп немә иш қилмақчи? әгәр мәбләғ селип йәр асти байлиқини булаң - талаң қилиду, дейилсә, бир күндә мәбләғ селип, бир күндә кан ечип, бир күндә пойизға қачилап елип кәткили болмайдиғу? "шинҗаң"ниң муқимлиқи, бихәтәрликини көздә тутқандиму, бу рәһбәрләрниң һечқандақ роли йоқ. Чүнки бу кишиләр һәрбий қисимларға, қораллиқ сақчи қисимларға буйруқ чүшүрәлмәйду. "Шинҗаң"ға ярдәм бериду дегәндиму, бу кишиләр хитай пулини яки байлиқни, долларни "шинҗаң"ға төкүвәтмәйду.

Тоғрисини ейтқанда, хитайлар давамлиқ сөзләп туридиған хәлқара вәзийәт хитайларға таза яхши пурсәт бәрмәй қалди. Ениқрақ ейтсақ америка, җуңго мунасивити худди еғир зукамдин сақайған адәмниң әһвалиға охшап қалди. Буниң ичидә һәммидин муһими президент обама буқетим вашингтонда ху җинтав билән көрүшкәндә йәнила хитай пулиниң обороттики қиммити мәсилисини тәкитлиди. Йеңила бейҗиңдин қайтип кәлгән америка малийә министирлиқиниң министири гәйтнер әпәнди ху җинтав билән президент обаманиң сөһбитигә қатнашти. Мәйли хитайға пайдилиқ болсун яки хитайға зиянлиқ болсун, хитай пулиниң обороттики қиммити өстүрүлидиғанла болса, хитай иқтисадиниң қурулмиси бәрдашлиқ берәләмду? мушундақ чағда ху җинтав әнсирәп юқири дәриҗилик кадирлирини "шинҗаң"ға әвәттиму? биңтуән, мәҗбурлап көчүрүп келингән хитай көчмәнлири, йәрлик милләт уйғурлардин ибарәт 3 бурҗәк сияси, иқтисади мунасивәтләр үстигә қурулған ваң лечүәнниң мустәқил падишаһлиқи җуңнәнхәйни әнсиритип қойдиму?

Яки әпәндимләр!

5 - Айда бейҗиңда өткүзүлидиған америка билән җуңгониң иқтисад мәсилилири сөһбити вә истратегийилик сияси сөһбити җуңголуқниң көңлигә яқмайдиған бир сияси һадисиниң шәписидин бишарәт берип қойдиму? 2009 - йили 7 - айниң 27 - , 28 - күнлири вашингтонда америка билән җуңгониң иқтисад мәсилилири сөһбити, истратегийилик сияси сөһбәт өткүзүлгәндә, 8 - айниң 4 - күни японийиниң "асахе симбун гезити" истратегийилик сияси сөһбәттә уйғур билән тибәт мәсилиси күн тәртипкә қоюлди дәп көрсәткән. Җуңголуқлар юқири дәриҗилик рәһбәрләрни мустәмликә уйғуристанға әвәткән болса, немидин чөчүп, йәнә немидин әнсирәп йүрүйдиғанду?