Хитайда мухбир ялған сөзлимисә җан бақалмайду

Мушу айниң 5‏-күни вә буниңдин бурун ню-йорк шәһиридә дағдуғилиқ аммиви вол кочисини игиләш намайиши болуп өтти.
Обзорчимиз сидиқ һаҗи рози
2011.10.07

Дәл шундақ күнләрдә 2011‏-йили 9‏-айниң 30‏-күни җуңгода алақидар тәрәпләрниң инглиз тилида нәшр қилинидиған “җуңго рибав” гезитидә “вол кочисида йүз бәргән наразилиқ намайишини хәвәр қилишни чәкләп қоюш, америка мәтбуатлириниң нумуссизлиқидур” мавзулуқ мақалә елан қилинди.

 Мақалидә “өткән икки һәптә ичидә кишиләр билмәйдиған мәхпийәтликниң бери-вол кочисида партлиған зор көләмлик намайиштур...” дәп көрситилгәндин башқа “...Мухбирниң әң зор мәсулийити-җәмийәттә сөз ибарилири аҗиз кишиләрниң садасини ашкарилаш” дәп көрситип, мақалиниң ахирида “...Америкиниң асаслиқ мәтбуатлириниң һәқиқий әһвални амминиң билишигә йол қоймиғанлиқи, америка мәтбуатлириниң нумуссизлиқидур” дәп америка ахбарат саһәсини әйиблиди.

Әһвал һәқиқәтән шундақму? с с н, б б с намайиш хәвирини көрсәтти. “ню-йорк вақит гезити” тор бетидә намайиш тоғрилиқ әтраплиқ хәвәр тарқатти. Америка симлиқ телевизийиси вә фокис хәвәрлири қатарлиқ телевизийиләр нәқ вақтида хәвәр тарқатти. Хитай мухбириниң дегинигә қарисақ, америка мәтбуатлири намайиш тоғрисида зади немини йошурупту?!америка мәтбуатлири намайишни хәвәр қилғанда һәр қандақ чәклимигә яки һөкүмәт тәрәптин бир чәкләшкә учриғини йоққу?!

Мақалиниң аптори америкида йүз бәргән намайишни, америка мәтбуатлири хәвәр қилмиди дәйдиған ялған хәвәрни ясап чиқип зади немә мәқсәткә йәтмәкчи? мухбир қандақ мәқсәткә йетиду, бу биз үчүн муһим әмәс. Лекин, кишиләр бу мухбирни ялғанчи мухбир дейишти. Әгәр мухбир ялғанчилиқ қилидиғанла болса, аввал әхлақи салаһийәтни, андин кәспи салаһийәтни тамам йоқатқан болиду.

Кишиләр тор бити яки телевизийә арқилиқ нюйоркта болуватқан намайишни көрүп турди. 2009‏-Йили 7‏-айниң 5‏-күни үрүмчи шәһәр башлиқи ли йи танкиниң үстигә чиқип уйғур намайишчиларни бастуруш тоғрисида сөзлигәндәк, ню-йорк шәһәр башлиқи танкиниң үстигә чиққиниму йоқ. Намайишчиларға қарши нутуқму сөзлимиди. Ваң лечүән уйғур намайишчиларни бастурушқа, һәрбийләргә буйруқ чүшүргәндәк, америкида һөкүмәт яки һәрбийләргә яки сақчиларға намайишчиларни бастуруш тоғрисида буйруқ чүшүрмиди.

Мана бу, дөләт; мана бу, америка; мана бу демократик түзүм; мана бу, инсанниң һаяти; мана бу, америкида түзүлгән асасий қанунниң қудрәтлик күчи вә қудрәтлик роһидур.

Америкида пуқралар асасий қанунниң роһи бойичә һәрикәт вә намайиш қилалиди. Хитайда асасий қанунға йезилғану-лекин, кишиләр кочиға чиқип намайиш қилаламду, әгәр қилалайдиған болса, хитай һөкүмити оқ чиқармайдиған иш боламду? шундақ ишлар җуңгода йүз бәргәндә қайси мухбир, йәнә қайси мәтбуат хәвәр қилалиди?

Америкида мәтбуатлар җим турди дегәнниң орниға “җуңго рибав” гезитигә мақалә язған мухбир, җуңгода мухбир ялған сөзлимисә җан бақалмайду, дәп мавзу қоюп мақалә язған болса, бу пикир көпрәк ғулғула қилишқа баш тема болуп бәргән болатти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.