Arzugül tursun xeliq'ara jem'iyetning arilishishi bilen doxturxanidin qoyuwétildi
Muxbirimiz shöhret hoshur
2008.11.18
2008.11.18
AFP Photo
Bu küni doxturxana namelum teshkilat we namelum shexislerning jiddiy agahlandurushi bilen opératsiyini 17 - noyabirgha yeni düshenbe künige kéchiktürdi. Arzugül tursun yekshenbe doxturxanidin qéchip ketkenliki üchün, hamile ikkinchi qétimliq xeterdin aman qaldi. 3 - Qétimda, hamile bügün yeni 18 - noyabir seyshenbe küni ili oblastliq ana - balilar doxturxanisida opiratsiye qilinmaqchi boldi. Arzugül tursunning dadisi tursunjan hesen toxtamgha mejburlan'ghan halda qol qoyup bolghan idi.
Hamilining 3 - qétimliq qutulushigha amérikining béyjingda turushluq bash elchisi seweb boldi. Bash elchi seyshenbe küni etigende xitay tashqi ishlar ministirliqi bilen körüshmekchi idi. Del mushu waqitta ili oblastliq ana - balilar doxturxanisida arzugül tursunning balisini chüshürüsh opiratsiyisi bolmaqchi idi.
Biz del mushu pursette mezkur doxturxanigha téléfon achtuq. Doxturxanidiki xadim, opératsiyining téxi bashlanmighanliqini, rehberlerning bu ishni muzakire qiliwatqanliqini, doxturlarning yuqiridin buyruq kütüwatqanliqini bildürdi.
Biz bu doxturxanigha ürümchi waqti kech sa'et 7 de yene bir qétim téléfon qilduq. Séstiralar arzugül tursunning chüshtin kéyin sa'et 4:25 te doxturxanidin chiqqanliqini bildürdi. Biz arzugül tursunning hamilisini chüshürüshke mes'ul xadim reshidedin ehwal igiliduq. Arqidinla arzugül tursunning dadisining öyige téléfon qilduq.
Hörmetlik oqurmenler, bir heptidin béri dunya Uyghur qurultiyining re'isi rabiye qadir xanim, amérika dölet mejlisi xitay ishlar komitétining mes'uli kiristofér simit, amérika awam palata ezasi ji'o pitts, amérikining béyjingda turushluq bash elchisi klarik rent qatarliq erbablar arzugül tursun mesilisige jiddiy köngül bölgen idi.
Bularning ichide, amérika bash elchisining xitay hökümiti bilen élip barghan diplomatik alaqilirining hel qilghuch rol oynighanliqi perez qilinmaqta.