“Ajrashmanglar ata-anilar” naxshisini kim ijad qilghan?

Emma bu naxshini kim qandaq shekilde éytmisun, bu naxsha naxshini sehnige tunji qétim élip chiqqan naxshichi mirzat alimning nami bilen baghlinip “Mirzat alimning naxshisi” dégen nami bilen atilip keldi. Tarixtin buyan naxshilarning lezzitidin huzurlinishni bilip, uning ijadchisining kimliki bilen anche hésabliship ketmeydighan Uyghur xelqi bügünki kündimu “Ajrashmanglar ata-anilar” dégen bu naxshini meyli Uyghur éli , meyli chet'ellerde bolsun, sehne, ékranlarda xelq naxshisi süpitide nam-nishansiz élan qilip kelmekte. Undaqta bu naxshining ijadchisi kim?

Küresh küsenning singlisi munewwer xanimning bildürüshiche, bu naxshini akisi küresh küsen 1988-yilining axirliri sen'et institutida oquwatqan mezgilide ijad qilghan bolup, akisining bu naxshini ijad qilishining melum ijtima'iy arqa körünüshi bar iken.

Küresh küsen Uyghur xelqning arisida tonulghan, hörmetke sazawer naxshichilarning biri bolup, u ijad qilghan bir qisim naxshilar el arisida nam-nishansiz éytilip kelmekte, bezi naxshilirining tékisti bashqa muzikilargha sélinsa, bezi ahanglirigha bashqa tékist sélip orundalmaqta. Mesilen “Adash”, “Söyimen”, “Anamgha xet”, “Yashisam deymen”, “Sözüm bar” we bashqilar.

Küresh küsen we mirzat alim hayat waqitlirida xizmetdash hem yaxshi dost sen'etkarlardin idi. Ularning naxsha orundash maharitide we ahanglarning mélodiyisidiki puraqlarni chiqirishtimu zor oxshashliqlar bar idi shundaqla ularning hayati we ölümimu oxshashliqlargha ige boldi. Ularning ölümliri yéshilmes sirlash ichide qaldi.