D u q xewernamisi neshirdin chiqmaqta

Bu yil 9 - aydin bashlap d u q ning gérmaniyidiki bash shitabi teripidin qerelsiz neshir qiliniwatqan "xewername" ning 2 - qismi 9 - ayning 14 -küni tarqitildi.
Muxbirimiz ekrem
2010.09.16
Share on WhatsApp
Share on WhatsApp
DUQ-Xewername-nusxisi-305 Süret, 3 - séntebir küni tarqitilghan "xewername" ning 1 - qismidin körünüsh.
RFA Photo / Ekrem

"Xewername" ning 1 - qismi, 3 - séntebir küni tarqitilghan bolup, uningda 5 - iyul weqesining bir yilliqi munasiwiti bilen dunyaning herqaysi jayliridiki Uyghurlar merkezliship olturaqlashqan 17 dölette élip bérilghan namayish we bashqa siyasiy yighilishlar toghrisida melumatlar bérilgen idi.
 
"Xewername" ning 2 - qismida bolsa, téximu köp mezmunlar orun alghan. D u q re'isi rabiye qadir xanim bashchiliqidiki qurultay xadimlirining siyasiy pa'aliyetliri, xitay hökümitining Uyghurlar üstidin yürgüzüwatqan diniy bésim siyasiti, Uyghur wetinidiki muxbirlar we tor bet mes'ullirining paji'elik teqdiri, xitayning Uyghurlarning ichki ezalirini sétishtek insaniyetsiz qilmishlirining barghanséri köpiyip bériwatqanliqi, üzlüksiz dawamlishiwatqan ölüm jazasi we qamaq jazaliri qatarliq jiddiy mesililer pakitlar bilen otturigha qoyulghan.
 
In'glizche we némische tillarda neshir qiliniwatqan bu xewernamining 2 - qismining axirigha, gherb metbu'atlirida élan qilin'ghan Uyghurlargha munasiwetlik maqalilar we uchurlargha a'it qanche onlighan torbet, gézit - zhurnal adrésliri qoshup bérilgen.
 
D u q bash shitabigha yéngidin xizmetke chüshken, mezkur xewernamini ishleshke mes'ul bolghan gérmaniyilik ziyaliy jana brandt xanim bu munasiwet bilen ziyaritimizni qobul qilip, bu xewernamida asasliq halda d u q ning élip bériwatqan siyasiy pa'aliyetliri, sherqiy türkistanning omumiy weziyiti toghrisidiki uchurlar, d u q ning bundin kéyin élip barghusi pa'aliyetliri qatarliqlardin ibaret ikenliki, mezkur xewernamini her ayda bir san neshir qilidighanliqi hemde dunyaning herqaysi jayliridiki d u q bilen alaqisi bolghan organlar hem shexslerge ewetidighanliqini bildürdi.
 
Dolqun eysa ependi bu xewernamining yawropa parlaménti, amérika dölet mejlisi, b d t we xelq'aradiki kishilik hoquq teshkilatlirigha qeder yollinidighanliqi, Uyghur dewasigha qiziqqanliki kishilerge élxet arqiliq ewetip bérilidighanliqini éytti.
 
Mezkur xewernamini ishlewatqan d u q xizmetchisi jana brandt xanim, xewernamining deslepki ikki nusxisining köngüldikidek ishlen'genlikini, nurghunlighan xelq'araliq teshkilatlarning köp memnun bolghanliqini bildürüp ötti.
 
Xewername köp xil témilar astida süretlik mezmunlar we Uyghur millitining nöwette duch kéliwatqan éghir weziyitige a'it delil - ispatlarni muhim nuqta qilghandin sirt, chet'el qelemkeshliri teripidin élan qilin'ghan xewerler we maqalilarning adréslirinimu teminleshke ehmiyet bergen. Bu seweblik, mezkur xewername yéqin kelgüside d u q ning eng yaxshi bir teshwiqat qoraligha aylinishi mumkin iken.

Yuqiridiki awaz ulinishidin, bu heqtiki melumatimizning tepsilatini anglaysiler.


 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.