Норвегийидики уйғурлар сәнәт консерти өткүзди

16-Июн күни норвегийидики уйғур сәнәт гурупписи пайтәхт ослониң колботин коммуна оппегорд мәдәнийәт мәктипиниң тәклип қилиши билән сәнәт паалийити өткүзди.
Ихтиярий мухбиримиз айгүл йүсүп
2011.06.16
Share on WhatsApp
Share on WhatsApp
norwigiye-senet-paaliyiti-305.jpg Норвегийидики уйғур сәнәт гурупписи пайтәхт ослониң колботин коммуна оппегорд мәдәнийәт мәктипиниң тәклип қилиши билән сәнәт паалийити өткүзди. 2011-Йили 16-июн.
RFA/Aygul

Бу қетимқи консертқа норвиг, уйғур вә башқа милләт кишилиридин җәмий йүзгә йеқин киши қатнашти.

Консерт башлиништин бурун сәнәт гурупписи әзалиридин бири болған кичик қиз меһрибану тамашибинларға норвиг тилида уйғурларниң тарихи, мәдәнийити вә һазирқи сиясий, иҗтимаий әһвалини қисқичә тонуштуруп өтти.

Консертта шох уйғурчә нахша-музика, усул орундалғандин башқа пианино билән орундалған тәқдир музикиси һәмдә ғеҗәк вә пианино билән билән челинған донай дәряси намлиқ музика тамашибинларни һаяҗанға кәлтүрди.

Оппегорд мәдәнийәт мәктипиниң мәсули нина кнарвик ханим шәрқий түркистан дегән исимни интайин чирайлиқ тилға елип туруп, өзиниң уйғурларни вә шәрқий түркистанни бу мәктәптә тил практикиси қилип ишләватқан дилшат әпәнди арқилиқ тонуғанлиқини, бүгүн орундалған уйғурчә нахша-музикини интайин яхши көргәнликини, уйғурларниң миллийчә сәнәт кийимлириниң интайин чирайлиқ икәнликини ипадә қилип өтти. У мухбирниң уйғурлар билән хитайларниң қандақ мәдәнийәт пәрқиниң барлиқини һес қилдиңиз дегән соалиға, әлвәттә бир милләт өз мустәқиллиқини йоқатқанда башқа милләтниң исми билән атилип қалиду. Бу интайин ечинишлиқ әһвал, лекин мән силәрниң нахша-усул мәдәнийитиңлар арқилиқ силәрниң хитайға тамамән охшимайдиған есил бир мәдәнийәтлик милләт икәнликиңларни чүшәндим дәп җаваб бәрди.

Нахша-музика арқилиқ уйғурниң есил мәдәнийитини башқа милләтләргә тонуштурушни асаслиқ мәқсәт қилған уйғур сәнәт гурупписиниң йетәкчиси мөминҗан әпәнди, бу паалийәтни орунлаштурулушқа алаһидә күч қошқан дилшат вә чәтәл музикилирини уйғурларниң әнәниви чалғу әсваблири билән орунлап аңлитишни уйғур сәнитини чәтәлликләргә тонуштурушниң йәнә бир усули дәп қариған яшар әпәнди қатарлиқлар бу қетимқи оюн қоюш паалийити һәққидә тохталди.

Чүш саәт 12 дин таки бирдин ашқучә давам қилған бу уйғурчә сәнәт консерти артисларниң шох чатма нахшилири вә тамашибинларниң усуллири билән алқиш садалири ичидә интайин мувәппәқийәтлик ахирлашти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.