Tenqidmu qimmitingizge qarap bolidu

Héch ish qilmighan ademni héchkim tenqidlimeydu. Emma birer ish qilghan, xususen birer utuq qazan'ghanlargha medhiyidin köprek tenqidler yaghidu.
Ixtiyariy muxbirimiz ömerjan
2012-03-01
Élxet
Pikir
Share
Print

Insanlarning kündilik turmushida tenqid we tenqidlesh dégenler bolup turidu. Shu éniqki, tüzitish bérish we islah qilish meqsiti bilen qilin'ghan tenqidning paydiliq ikenlikini héchkim inkar qilmaydu.

Emma tenqid birawdin öch élish yaki utuq qazan'ghan birige köz qizartish meqsiti bilen élip bérilghanda, hergiz ijabiy netije bermeydu. Bu waqittiki tenqid körelmeslikning türtkisi bilen otturigha chiqqan selbiy tenqid bolup qalidu.

Meshhur islam mutepekkuri muhemmed ghazali "Hayatingizni yéngilang" namliq esiride mundaq dep yazidu: ‏
‏- Körelmesliktin ibaret bu rezil illet insanlar yer yüzige peyda bolghandin biri mewjuttur. Dunyada shundaq insanlar barki, birawda kamaletning alametliri jilwilense yaki allah ata qilghan birer talant otturigha chiqsa, ular qattiq bi'aram bolup, iztirap chékidu, taki bu artuqchiliq yoqalmighuche qet'iy rahet alalmaydu.

Bu néme üchün shundaq bolidu? chünki körümsiz güzellikni özi üchün tehdit, eqilsiz eqilni özi üchün düshmen dep qaraydu.

Amérikidiki"Insaniy munasiwetler instituti" ning qurghuchisi dé'il karnik "Nurghun kishiler medeniyet yaki shöhret yaki utuq jehette özliridin üstün turidighanlarni qarilash arqiliqla özlirige teselli tapalaydu" dégen iken.

Körelmesler héchkimge ziyan yetküzelmeydu

Muhemmed ghazali mezkur esiride yene mundaq dep yazidu:
Qedimde bir ereb sha'iri mundaq dégen iken:
Sewr qilghin heset qilsa, sewring uni öltürer,
Tügep qalsa yéqilghular, otmu özin köydürer.

Yene bir sha'ir mundaq dégen iken:
Qawighan her bir itqa atmaq bolsa idi birdin tashni,
Bésip chüsher idi tashning bahasi altun-kümüshni.

Amérikiliq yazghuchilardin biri mundaq dégen iken:
‏-Kishilerning tilini baghlap qoyghili küchüm yetmeydighanliqi üchün küchüm yétidighan ishni qilishni biliwaldim, u bolsimu, kishilerning tenqidlirige we malametlirige perwa qilmasliqtur.

Amérikining sabiq re'isliridin biri ibraham linkolin "Eger manga kelgen tenqidlerni oqumaqchi bolsam, méning waqtimning hemmisi ularni oqush we reddiye bérish bilenla ötüp ketken bolatti. Shunga men manga qaritilghan tenqidlerge perwa qilmaymen. Muhim bolghini wezipemni toluq ada qilishtur. Chünki men wezipemni toluq ada qilip, netije yaritalisam, manga qaritilghan bu tenqidler özlükidin yoqilip kétidu" dégen iken.

Toluq bet