Chémpiyon ümid hajining utuqi we Uyghur tordashlarning inkasliri

Xitayning merkizi téléwiziyisi teripidin ötküzülgen 2010 ‏- yilliq in'gliz tili we talant musabiqiside, Uyghur yash ümid hajining chémpiyon bolushi Uyghur tordashlar arisida küchlük hayajan peyda qildi. Gerche musabiqe axirlashqinigha xéli bolghan bolsimu, mezkur musabiqige qarita inkaslar hélihem dawam qilmaqta.
Muxbirimiz shohret hoshur
2010.10.06
Share on WhatsApp
Share on WhatsApp
Umut-Haji-musabiqide-English-chempiyon-305 Süret, chémpiyon ümid hajining nutuq sözlewatqan körünüshi.
www.youtube.com Din élindi.

Yash talant igisi ümid haji mezkur musabiqidiki tunji nutqida, Uyghur muzika eswapliridin rawabni tonushturghan. Shundaqla u, meydan'gha badam doppa we kaniway köynek bilen chiqip özining milliy iptixar tuyghusini namayen qilghan.

Bu heqte tordashlardin biri mundaq deydu: "milliy kimlikni gewdilendürüsh, ümidning musabiqe jeryanidiki bir xasliqi, yasha ümid haji xelqing séningdin pexirlinidu, xelqing sanga medet béridu!"

Yene bir inkasta, ümid hajining sehnide namayen qilghan pisxik tengpungluqi we hazir jawabliqigha apirin oqulup mundaq déyilgen: "ümidni chémpiyonluqqa érishtürgen yalghuz in'glizche teleppuzidiki toghriliq emes, eng muhimi uningdiki rohiy sapadur. Yasha ümid kim ikenlikimizni bir qétim tonutup qoydung."

Ümid haji ikkinchi meydan musabiqidiki nutqida ürümchide doxturxanida yatqan bir dostini eslep ötidu hem u dostigha yardem qilish üchün qolidiki rawabini satidighanliqini élan qilidu. U bu nuqtida 500 yüen pulning tamashibinlar üchün héchqanche emeslikini, Uyghurlar üchün bolsa buning alahide miqdarda jiq pul ikenlikini eskertip ötidu.
 
Ümid hajining qisqighina pursette, Uyghur élining iqtisadiy weziyitidin bisharet bérip ötüshi Uyghur tordashlarning alqishigha érishken. Melum bir tor bette, ümid hajining utuqini tebriklep 50 din artuq inkas yézilghan.
 
Inkaslardin biride bayan qilinishiche, ümid haji shinjang maliye iqtisad uniwérsitétining komputér kespini püttürgen. Nöwette ürümchidiki bir xususiy mektepte in'gliz tilidin ders bermekte.

Yene melum bolushiche, ümid haji in'gliz tilini özlikidin ögen'gen. Uning hel qilghuch musabiqidiki riqabetchisi go winna bolsa, béyjingdiki chet'el til uniwérsitétining oqughuchisi. Yeni axirqi hel qilghuch musabiqe cheklik imkanlarda öz - özini yétildürgen bir Uyghur yash bilen, yéterlik shara'itlarda dölet teripidin terbiyiliniwatqan bir xitay yash arisidiki musabiqe. Musabiqining ghalibi Uyghur yash yeni ümid haji. Mana bu sélishturma Uyghur tordashlarni eng köp derijide hayajanlandurghan.
 
Mana bu nuqtida pikir bayan qilghan bezi inkaschilar, eger Uyghur yashlirimu, bashqilar ige bolghan kengri imkanlargha ige bolsa, oqushqa qobul qilinish we xizmet tépish qatarliq jehetlerde putlikashanggha yoluqmisa, yene köpligen talant igilirining meydan'gha chiqidighanliqini eskertken.

Chémpiyon ümid hajidiki üz yéshidin halqighan bir temkinlik we salapet, musabiqe bahalighuchilirinimu tesirlendürgen. Bahalighuchilardin biri, hayatidiki eng muhim qararliridin birini bériwatqanliqini bildürüp, chémpiyonluqqa ümid hajini körsetken. Netijide ümid haji birinchilikke érishken.

Uyghur tor betlirining qayta échilghinigha bir qanche ay bolghan bolsimu, tor betlerde jim - jitliq yenila höküm sürmekte idi؛ bolupmu 5 ‏- iyul weqesining aldida körülüp turidighan qaynaq bes ‏- munaziriler asasen tarixqa aylinip ketkendek bir weziyet közge chéliqmaqta idi.

Bu nöwet ümid hajining chémpiyon bolushi, Uyghur tor betliridiki bu jimjitliqni tunji qétim buzup tashlidi. Uyghur tordashlar, chémpiyonluq utuqigha bes - beste inkas qayturup özlirining jem'iyet we weziyet heqqidiki qarashlirini izchil halda bayan qilmaqta.

Yuqiridiki awaz ulinishidin, chémpiyon ümid hajining musabiqidiki utuqi we uninggha qarita Uyghur tor betliride yézilghan inkaslar heqqidiki melumatimizning tepsilatini anglaysiler.

 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.