Истанбулда шәрқий түркистан йәрмәнкиси ечилди

2011‏-Йили 5-айниң 28-күни ечилған бу йәрмәнкидә бир тәрәптин уйғурларниң өрп-адәт мәдәнийәтлирини тонуштуруш паалийити елип берилди вә уйғурларниң миллий-кийимлири қоюлди, йәнә бир тәрәптин иқтисадий кирим қилиш мәқситидә уйғур таамлиридин ләңмән, полу, манта, самса, сериқ аш, ләңпуң вә печинә-пирәник қатарлиқ уйғур таамлири шундақла һәр хил әр -аялчә кийим-кечәкләр вә шуниңға охшаш һәр хил әшялар йәрмәнкидә әрзан баһада сетилди. Бу йәрмәнкигә истанбулда яшаватқан уйғур аяллар һәмкарлишип өз ихтиярлиқи билән өйлиридә уйғурчә таамларни пишуруп әкелип ианә қилди.

RFA/Arslan

Бу йәрмәнкидә уйғурларниң миллий мәдәнийитини тонуштуруш паалийити елип бериш билән биргә, иқтисадий кирим қилиш мәқситидә иҗтимаий һаятта еһтияҗлиқ болған уйғурчә йемәк-ичмәк, кийим-кечәк вә һәр хил нәрсә-керәкләр сетилди. Бу йәрмәнкә 5-айниң 28-күнидин 6-айниң 2-күнигичә 4 күн давам қилидиған болуп, йәрмәнкигә қатнишиватқанларниң тәләп вә тәшәббуси билән вақитни бир һәптә узартиш еһтимали бар икән. Бу йәрмәнкини көп санда кишиләр қизиқип зиярәт қилмақта.

Бу йәрмәнкини зиярәт қиливатқанларниң сани көп болуп, чоң һәҗимдики чедирниң ичигә икки қатар қилип тизилған һәр хил әшяларни кишиләр таллап мувапиқ көргәнлирини қизғинлиқ билән сетивалди. Чедирниң әтрапиға шәрқий түркистан йәрмәнкисигә хуш кәлдиңиз дегән чоң хәт йезилған, чедирниң үстигә шәрқий түркистан байриқи билән түрк байриқи есилған.

Биз бу паалийәт һәққидә техиму көп мәлуматқа еришиш үчүн шәрқий түркистан маарип вә һәмкарлиқ җәмийитиниң башлиқи һидайәтуллаһ оғузхан вә аяллар бөлүминиң мәсули мунәввәр өзуйғурханим билән сөһбәт елип бардуқ.

Һидайәтуллаһ оғузхан бу паалийәтни уюштуруштики мәқсити ипадиләп, уйғурларниң мәдәнийитини тонуштуруш вә йәнә бир тәрәптин иқтисади кирим қилип, шәрқий түркистан даваси үчүн һәссә қошуш икәнликини билдүрди.