ھالبۇكى، تۈركىيىدىكى دەرسلىك كىتابلاردا قەدىمكى ئۇيغۇر دۆلەتلىرى ھەققىدە مەلۇمات بېرىپ، ئۇيغۇرلارنىڭ بۈگۈنكى ۋەزىيىتى ھەققىدە مەلۇمات بېرىلمىگەن بولغاچقا، ئۇيغۇرلارنى تارىختا ئۆتكەن بىر مىللەت دەپ بىلىدىغان تۈركلەرنىڭ سانىمۇ ئاز ئەمەس.
ئەنقەرەنىڭ ئەتىمەسگۇت رايونىدا ئۆتكۈزۈلۈۋاتقان خەلقئارا مەدەنىيەت - سەنئەت فېستىۋالنىڭ9 - ئاينىڭ 22 - كۈنىدىكى ئۇيغۇر سەنئەت كېچىلىكىنى كۆرۈۋاتقان تاماشىبىنلاردىن "ئۇيغۇرلارنى بىلەمسىز؟"، "ئۇلار ھازىر قەيەردە ياشايدۇ؟" دەپ سورىدۇق.
بىز سوئال سورىغان كىشىلەرنىڭ 30 پىرسەنتى ئۇيغۇرلارنىڭ تارىختا ئۆتكەن بىر مىللەت ئىكەنلىكىنى، ھازىرقى ئەھۋالىنى بىلمەيدىغانلىقىنى ئېيتىشتى. 70 پىرسەنتى بولسا ئۇيغۇرلارنى بىلىدىغانلىقىنى، ئۇيغۇرلارنىڭ ھازىر شەرقىي تۈركىستاندا، خىتايلارنىڭ قول ئاستىدا ياشاۋاتقانلىقىنى، ئۇلارنىڭ ھازىرقى ۋەزىيىتىگە قاتتىق ئېچىنىدىغانلىقىنى ئېيتىشتى.
يۇقىرىدىكى ئاۋاز ئۇلىنىشىدىن، بۇ ھەقتىكى مەلۇماتىمىزنىڭ تەپسىلاتىنى ئاڭلايسىلەر.