Вақитни теҗәшниң 20 усули

Кувейтта чиқидиған “әл муҗтәмә” журнилида “вақитни теҗәшниң 20 усули” дегән темида бир мақалә елан қилинған.
Ихтиярий мухбиримиз өмәрҗан
2012.10.19
Share on WhatsApp
Share on WhatsApp

Мақалидә мундақ дәп йезилған:
1. Әқлиңизни әң мәнпәәтлик ишларға сәрп қилиң. Чүнки инсан әқлини тоғра йолларға сәрп қилғинида, у өзиниң йүрүш- турушини вә сулукини тизгинләштә тайинидиған әң күчлүк вә әң әһмийәтлик бир асасқа игә болған болиду.
2. Вақитни сәрп қилишта өзиңиздин һесаб елишни билиң. Һәр вақит өзиңиздин “мән вақтимни растинила тоғра йосунда вә пайдилиқ ишларға сәрп қиливатимәнму? вақитни теҗәшни биливатимәнму?” дегән соалларни сорап туруң.
3. Бүгүниңизни түнүгүндин әвзәл һәм пайдилиқ қилиң.
4. Қолға кәлгән пурсәтләрдин пайдилинишни билиң. Пурсәтни ғәниймәт билиң. Инсанға һаятида икки хил пурсәт келиду. Бири тәйяр учрап қалған пурсәт, йәнә бири, сиз иҗад қилидиған пурсәт. Әмма шу ениқки, пурсәтләр наһайити тиз өтүп кетиду вә сақлашни зади билмәйду. Әпсуски, бу пурсәтләр кәткәндиму қайта кәлмәскә кетип қалиду.
5. Ишта җиддий болуң. Бәзи кишиләр җиддий болушни кечә-күндүз йеңини түргән һалда, алақзадилик билән туруш дәп чүшинивалиду. Әпсуски ундақ қилиш җиддийлик әмәс.
6. Чидамлиқ вә сәврлик болуң. Чүнки тәҗрибиләрни давамлаштурушқа чидамлиқ болуш вә җапаға чидап, тохтимастин ишләш ғәлибиниң сирлиридин биридур.
7. Тәҗрибиләрни хатириләп сақлаң. Чүнки һаятлиқтин алған өз тәҗрибилириңизни вә башқиларниң тәҗрибилирини хатириләп сақлаш ғәлибиниң йоллирини өгитиду.
8. Вақтиңизни чиң тутуң. Бир һәдистә: “ өмрүңни пул-мелиңни чиң тутқандинму бәк чиң тутқин”дәп кәлгән.
9. Башлиған ишиңизни ахириға чиқармастин болди қилмаң.
10. Мол һосул бериш йоллириңизни тәрәққий қилдуруп туруң.
11. Мәғлубийәтни ғәлибиниң йоли қиливелиң.
12. Әң яман шараитлардиму вақитни теҗәшни қолдин бәрмәң. Чүнки адәттики шараитларда һәр ким вақтини теҗәп иш қилалайду. Әмма яман шараитларда вақит худди судәк еқип кетиду.
13. Һәр ишта алди билән өзиңизгә тайиниң. Чүнки өзигә тайиниш адәмниң ичидики запас енергийини партлитип сиртқа чиқириду.
14. Башқилардин ярдәм сорашни сәл чағлимаң. Чүнки инсан қанчилик мукәммәл болуп кәткән тәқдирдиму йәнила у башқиларниң ярдимигә моһтаҗ болиду. Башқиларни һәмкарлиққа чақириш дегән мәсулийәттин қечиш мәнисигә кәлмәйду. Бәлки уларниң тәҗрибисидин пайдилиш мәнисигә келиду.
15. Тиришиң, иҗтиһат қилиң, үмидсиз болмаң.
16. Һиммитиңиз билән учуңки, һурунлуқ билән ухлимаң. Бир һәдистә:“ адәм һиммити билән, қушлар икки қанити билән учиду”дәп кәлгән.
17. Ишни қетирқинип тиз қилишни адәт қиливелиң.
18. Бәргән вәдигә вапа қилиң. Чүнки вәдидә турмаслиқ, вәдиләшкән җайға бармаслиқ қарши тәрәпниң қиммәтлик вақтини оғрилиғанлиқтур.
19. Келәчәккә үмид билән қараң. Ғәлибә қилиш үчүн муну үч нәрсини унтумаслиқ лазим: өтмүштин ибрәт елиш, һазирни ғәниймәт билиш вә келәчәккә үмид билән беқиш.
20. яхши ишларни вуҗудқа чиқириш йолида башқилар билән бәслишиң. Унутмаңки, бәслишиш пәқәт вақит билән болиду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.