'Xitaylarning meqsidi pütün milletlerni yoqitish' namliq kitab yaponiyide neshirdin chiqti

Yaponiyide 3 - ayning 5 - küni neshirdin chiqqan "xitaylarning meqsidi pütün milletlerni yoqitish" namliq kitabning muqawa körünüshi.

Bu kitabning aptorliridin biri bolghan ilham mexmut ependining éytishiche bu eser yaponiyide Uyghurlar heqqide neshir qilin'ghan kitablar ichide Uyghur aptor yapon tilida yazghan tunji eser iken.

Bu kitab 237 bettin terkip tapqan bolup, ktabda Uyghur, mongghul we tibet aptorlarning öz milletlirining tarixi, bügünki weziyiti, xitay hökümitining bu milletlerge élip bériwatqan bésim siyasiti, dunyadin shundaqla yaponiyidin kütken ümidliri qatarliq mesililer bayan qilin'ghan.

Bu kitabning Uyghurlar heqqidiki bölümini yazghan yaponiye Uyghur jem'iyiti bashliqi ilham mexmut ependi kitabida Uyghurlarning tarixi heqqide qisqiche melumat bergendin kéyin, nuqtiliq halda 1933 - yili qeshqerde, 1944 - yili ghuljida qurulghan sherqiy türkistan jumhuriyetliri heqqide toxtalghan.

Ilham mexmut ependi `xitaylarning meqsidi pütün milletlerni yoqitish" namliq bu kitabning Uyghurlar heqqidiki bölümide yene Uyghurlarning bügünki weziyiti we kélechektin kütken ümidlirimu bayan qilin'ghan. Bu kitabning tash wariqigha xitay xelq jumhuriyitining xeritisi qoyulghan bolup Uyghur diyari ayyultuzluq kök bayraq bilen körsitilgen.

Ilham mexmut ependining déyishiche bu kitabni élishni xalighanda amazon.com Adrisidin sétiwalsa bolidiken. Biz bu kitab heqqide tepsili melumat élish üchün kitabning aptorli'iridin biri bolghan ilham mexmut ependi bilen téléfon ziyariti élip barduq.

Yuqiridiki awaz ulinishidin, bu heqtiki melumatimizning tepsilatini anglaysiler.