Хитайниң уйғур елидики йәслиләргә оқутқучи қобул қилиш шәртлири тәнқидкә учримақта

Хитай һөкүмити уйғур елиниң "қош тил" йәслилириниң оқутқучилирини таллашта, уларниң сиясий идийә вә милләтләр иттипақлиқи җәһәттә "мәйдани мустәһкәм болуш"ни алдинқи шәрт қилидиғанлиқини тәкитлигәндин сирт, 19 миң кишидин 2850 миңни оқотқучилиққа таллайдиғанлиқини, йәнә оқутқучилиққа қобул қилинидиғанлар ичидә илгири хитай армийисигә қатнашқанлар вә уларниң аилә тавабиатлириға алаһидә етибар берилидиғанлиқини әскәрткән.
Мухбиримиз әқидә
2010-08-17
Share

Хитай һөкүмити, "қош тил" оқутқучилириниң қошунини күчәйтиш үчүн, йеқинда пүтүн уйғур или бойичә 2 ‏- түркүмдә йезилардики "қош тил" йәслилиригә оқутқучи тәклип қилиш хизмитини башливәткән.

Хитай ахбарат вастилириниң бу һәқтә елан қилған хәвиридә, уйғур аптоном районлуқ партком даимий комитетиниң әзаси әркинҗан турахунниң сөзлири елан қилинған болуп, әркинҗан турахун, йәсли оқутқучилирини сиясий идийә вә милләтләр иттипақлиқи җәһәттә тәрбийиләшни күчәйтиш тәшәббусини оттуриға қойған.

Әркинҗан турахун, "оқутқучиларни милләтләр иттипақлиқидики мәйдани мустәһкәм, байриқи рошән нәмуничилар вә садиқ әмәлийәттин өткүзүгүчиләрдин қилип тәрбийиләш керәк" дегәнгә охшаш пикирлирини баян қилиш билән биргә йәнә, " балиларни тәрбийиләш хизмитигә йүксәк әһмийәт берип вә күчәйтип, мол мәзмунлуқ, чүшинишлик, җанлиқ усуллар арқилиқ, балиларда колликтипни сөйүш, юртини сөйүш, вәтәнни сөйүш, милләтләр иттипақлиқини қоғдаш туйғуси вә пәзилитини йетилдүрүш керәк" дәп алаһидә тәкитлигән.

Хәвәрдә йәнә, "қош тил" йәслилириниң оқутқучилиририни таллап қобул қилишта, әскәрликтин қайтқанлар вә уларниң аилә тавабиатлириға алаһидә етибар бериш сиясити иҗра қилинидиғанлиқи қәйт қилинған.

Бу қетим һөкүмәт даирилири йәнә, йәсли оқутқучилирини таллашта охшашла емтиһан елиш усулини қоллинип, уйғур елиниң 15 вилайәт, област вә шәһәрлиридә язма емтиһан нуқтиси тәсис қилип, имтиһанға қатнишидиған 19 миңдин артуқ кишидин аран 2850 кишини оқутқучилиққа қобул қилидиғанлиқини билдүрди.

 Уйғур илида "қош тил" маарипини йолға қойғандин буян, мәйли йәслиләргә болсун вә яки башланғуч, оттура мәктәпләрдә болсун, оқутқучи қобул қилишта, оқутқучиларниң хитайчә тил сәвийисини биринчи орунға қоюшни алдинқи шәрт қилип бәлгилигәнликини билдүргән уйғур сиясий паалийәтчилири, хитай һөкүмитиниң "қош тил" маарипини йолға қоюш қалпиқи астида мол билимгә игә пешқәдәм устазларни иштин бошитиветиш сияситини ишқа селип кәлгәнликини, һәтта миллий оқутқучиларниң орниға хитай оқутқучилирини сәпләп уйғурларниң ишсизлиқ санини һәссиләп көпәйтиватқанлиқини оттуриға қоймақта.

Радиомизға бу мәсилиләр һәққидә инкас билдүргүчиләрму, уйғур аптоном райониниң мәркизи үрүмчи шәһириниң уйғурлар әң көп олтурақлашқан "үч таш" райониға җайлашқан "қизил байрақ йәслиси"дә илгири пүтүнләй уйғур оқутқучилар хизмәт қилидиған болуп, нөвәттә йәслидә хизмәт қилидиған уйғур оқутқучидин бириму қалмиғанлиқини, шу сәвәблик бу йәслидә уйғур балиларниму көргили болмайдиғанлиқини билдүрди.

Биз бу һәқтики инкасларниң тоғра яки хаталиқини ениқлаш үчүн, "қизил байрақ йәсли" гә телефун урдуқ.

Йәсли нөвәтчи хадими, бизниң "йәслидә қанчилик уйғур оқуғучи вә оқутқучи бар?" дегән соалимизға толуқ җаваб бәрмәй "һазир тәтил мәзгили" дәп телефун турупкисини қоювәтти.

Уйғур елиниң йезилардики йәсли әһваллиридин мәлумат елиш үчүн биз или области кепәк йүзи йезисиниң уйғур йеза башлиқиға телефун урдуқ. Йеза башлиқи биз билән қисмән мәсилиләр үстидә азрақ талаш - тартиш қилғандин кейин, биз ениқлап билмәкчи болған муһим мәсилиләр һәққидики соалимизни йәнила җавабсиз қойди.

Уйғур елидики йәслиләргә оқутқучи қобул қилишта, әскәрликтин қайтқанлар вә уларниң аилә тавабиатлири алаһидә етибарға елинидиғанлиқи тоғрисидики мәсилигә, америкидики уйғур зиялийси қутлуқ алмас әпәнди өз наразилиқини билдүрди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.