Donald tramp sabiq kéngesh palata ezasi dawid pérduni xitayda turushluq bash elchilikke körsetken
2024.12.06
Kéler ay wezipe tapshuruwalidighan pirézidént donald tramp amérikaning xitayda turushluq bash elchilikige sabiq kéngesh palata ezasi we “Fortun 500” shirkitining bash ijra'iye emeldari dawid pérdu (David Perdue) ni körsetken.
NBC Xewerler torining bildürüshiche, donald tramp bu qararini jakarlighanda “Dawid pérduning 40 yilliq xelq'araliq soda hayatini bashtin kechürgen we amérika kéngesh palatasida xizmet qilghan biri bolush süpiti bilen, qimmetlik tejribiliri arqiliq amérikaning xitay bilen bolghan munasiwetlirini qurushigha yardem béridighanliqini” bildürgen.
Xewerde déyilishiche, dawid pérdu kespiy hayatining köp qismida xitay, sin'gapor, xongkong we bashqa asiya döletliride ishligeniken.
Tramp mundaq dégen: “U méning rayon tinchliqini qoghdash istratégiyemni yolgha qoyushta hem shundaqla xitay rehberliri bilen ünümlük xizmet munasiwiti ornitishta muhim rol oynaydu”.
2025-Yili 1-ayda wezipige olturidighan donald tramp wezipini resmiy ötküzüwalghandin kéyin xitay mallirigha %60 yaki uningdin yuqiri tamozhna béji qoyidighanliqini dep kelmekte. Uning bu nöwetlik yéngi kabinétigha qoyghan muhim kishilirining köpinchisining xitaygha qattiq qolluq siyaset yürgüzüshni teshebbus qilghuchilar bolghachqa, amérika-xitay munasiwetlirining bundin kéyinki tereqqiyati küchlük diqqet nuqtisi bolup qaldi.
Sabiq kéngesh palata ezasi dawid pérduning xitayda turushluq bash elchi qilip körsitilishi amérika dölet mejlisi teripidin testiqlan'ghandin kéyin andin resmiylishidu.