Хәлқара олимпек комитетиниң муавин рәиси уйғур мәҗбурий әмгики мәсилисигә четишлиқ икән

Ихтиярий мухбиримиз җәвлан
2021-08-09
Share

Пүтүн дуняда кишилик һоқуқ мәсилисигә көңүл бөлүватқан дөләтләр, һөкүмәтсиз тәшкилатлар вә сиясий әрбаблар келәр йили өткүзүш пиланланған бейҗиң қишлиқ олимпек мусабиқисини байқут қилиш, уни башқа дөләткә йөткәш чақириқи қиливатқан бу күнләрдә, хәлқара олимпек комитетиниң муавин рәиси, 2022-йиллиқ бейҗиң қишлиқ олимпек мусабиқисини тәшкилләш комитетиниң рәиси хуан антонийо самаранч салисачс бу мусабиқини хитайда өткүзүш мәйданида чиң турмақта икән.

 яху торида елан қилинған бир хәвәрдә ейтилишичә, салисачсниң башқурушидики тәнтәрбийә хәйр-сахавәт оргини самаранч фонди хитайдики анта ширкитиниң ярдимигә еришкән. Тәнтәрбийә кийимлири ишләпчиқиридиған анта ширкити уйғур районидики мәҗбурий әмгәк мәсилисини қилчә нәзәргә алмай, шинҗаң пахтисини давамлиқ ишлитиватқан ширкәтләрниң бирси икән. Самаранч фонди 2012-йил қурулғандин буян изчил һалда анта ширкитиниң иқтисадий ярдимигә еришип кәлгән. Салисачс 2016-йили хәлқара олимпек комитетиниң муавин рәиси болғандин кейин анта ширкитиму олимпек комитетиниң қоллишиға еришкән. Мәзкур комитет анта ширкитини бу йил өткүзүлүватқан токйо язлиқ олимпек мусабиқиси вә келәр йилдики бейҗиң қишлиқ олимпек мусабиқисини өткүзүшкә мәсул олимпек комитети әмәлдарлирини кийим билән тәминләйдиған ширкәт дәп елан қилған.

Хәвәрдә көрситилишичә, хуан антонийо самаранч салисачс хәлқара олимпек комитетиниң сабиқ рәиси самаранчниң оғли болуп, сабиқ рәис самаранч болса 2008-йил хитайниң олимпек мусабиқиси өткүзүшигә төһпә қошқан шәхс икән. Салисачс дадисиниң йолиға варислиқ қилип, та һазирғичә хитай билән йеқин мунасивәт орнитип кәлгән. У хитайдики анта ширкитидин башқа йәнә мәҗбурий әмгәккә четишлиқи болған көплигән ширкәтләр билән шерикләшкән болуп, хәлқарадики кишилик һоқуқ органлириниң чақириқлириға қулақ салмай кәлгән. 2020-Йили у кишилик һоқуқ паалийәтчлири билән өткүзгән бир йиғинда, бейҗиң қишлиқ олимпек мусабиқисини башқа җайға йөткәш тәклипини рәт қилған.

Кишилик һоқуқ көзәтчилириниң қаришичә, салисачсниң "шинҗаңда мәҗбурий әмгәк мәсилиси йоқ" дәп қарайдиған хитай ширкәтлири вә хәлқара ширкәтләр билән һәмкарлишиши хәлқара олимпек роһиға хилап қилмиш һесаблинидикән. Униң бу хил қилмишлириниң ашкарилиниши, америка дөләт мәҗлисидики икки партийәниң техиму бирлишип, бу мусабиқини байқут қилишини илгири сүридикән.

    

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт