Ford shirkitining Uyghur mejburiy emgikige chétishliq xitay shirkiti bilen bolghan hemkarliqi tekshürüshke duch keldi

Amérikining ford aptomobil shirkitining Uyghur mejburiy emgikige zich baghlinishliq bir xitay bataréye shirkiti bilen bolghan hemkarliq munasiwiti, amérika dölet mejlisining jumhu'iyetchi palata ezalirining diqqitini qozghap, ularning tekshürüshige duch kelgen. “Nyu-york waqti” we washin'gtondiki “Töpilik” gézitlirining xewer qilishiche, amérika awam palatasi xitay istratégiyelik riqabet alahide komitétining re'isi mayk gallagér bilen awam palatasi xam chot komitétining re'isi qéyson simit, 23-iyul ford shirkitige xet yézip, bu shirketning xitayning “Ningdé zaman téxnologiye shirkiti” bilen bolghan hemkarliq munasiwitige da'ir höjjetler bilen teminlishini telep qilghan.

Xitayning “Ningdé zaman téxnologiye shirkiti” dunyadiki eng chong litéyliq bataréye ishlepchiqirish shirkiti bolup, bu shirketning 2022-yili ishlepchiqarghan bu xil mehsulati dunya bazirining 37 pirsentini igiligen. “Töpilik” gézitining bildürüshiche, mayk gallagér bilen jéyson simit xétide, ammigha ashkara bolghan maliye höjjetliride we xitay xelq jumhuriyitidiki taratqularning xewerliride “Ningdé zaman shirkiti” ning Uyghur rayonidiki shirketler bilen bolghan munasiwitini yoshurush üchün tedbir alghanliqi qeyt qilin'ghanliqini, halbuki amérika xitayning musulman Uyghurlargha qarita irqiy qirghinchiliq qiliwatqanliqini békitkenlikini tekitligen.

Xette mundaq déyilgen: “Biz bügün bu xetni yézishta fordning ‛ningdé zamaniwi shirkiti‚ning shinjangdiki shirketler bilen bolghan alaqisini yoshurushqa urun'ghanliqigha da'ir melumati shundaqla uning amérika bataréye mehsulatlirini tereqqiy qildurush wedisige a'it uchurlargha érishishni meqset qilduq.”

Melum bolushiche, gallagér bilen simit ford shirkitining ford bilen xitay shirkiti otturisidiki soda ijazetnamisining köpeytilgen nusxisi, jümlidin barliq qoshumche détallar bilen teminlishi, ford bilen xitay shirkiti arisidiki ijazetname kélishimige munasiwetlik barliq alaqe, höjjetlerning esli tildiki orginali, ford bilen baydén hökümiti otturisida yézishqan ford bilen xitay shirkitining soda ‍ijazetnamisige munasiwetlik alaqe, höjjet we baj kriditige a'it matériyallar bilen temilishini telep qilghan.