Malayshiyada qachaqlar kolléktip halda kömüwétilgen jaylar tépildi

Malayshiya da'iriliri bén'gal qatarliq döletlerning köchmenlirining jesetliri kömülgen bir qanche azgallarni tapqanliqini bildürdi. Malayshiya ichki ishlar ministiri zahit xemidining bildürüshiche, ular ötken hepte malayshiya bilen tayland chégrisigha yéqin jaydiki adem etkeschiliri ishlitidighan bir yéza etrapidin mezkur jesetler kömülgen azgalliqlarni tapqan.

Roytérsning xewer qilishiche, ziyankeshlikke uchrighuchilarning köpinchisi bén'galliqlar we taylandin qéchip chiqip ketmekchi bolghan rohin'ga musulmanliri iken.

Malayshiya da'iriliri ilgiri öz tewelikide qachaqlarning jesetliri kömülgen azgallar barliqi we hetta tutup turush lagéri barliqini inkar qilghan idi.

Tayland saqchi da'irlirimu yéqinda öz dölet térritoriyiside qachaqlarning jesetliri kömülgen jaylarni bayqighan.

Malayshiyadin tépilghan,mezkur qachaqlarning jesetliri kömülgen azgalliqlar heqqide yekshenbe küni malayshiya ichki ishlar ministiri zahit xemidi tunji qétim ashkarilighan bolup, u bu kishilerning adem etkeschilikining qurbanliri ikenlikini éytqan bolsimu, emma qanchilik jeset bayqalghanliqi heqqide uchur bermigen. Malayshiya metbu'atliri mundaq qebridin 30 nechchisi tépilghanliqi, u yerlerge yüzligen ademlerning kömüwétilgenlikini yazghan.