Amérika hökümiti Uyghur mejburiy emgikige chétilghan xitaydiki “Yida (Esqual) toqumichiliq guruhi” ning mehsulatlirini cheklidi

Amérika ana weten xewpsizliki ministirliqi 31-öktebir küni Uyghur mejburiy emgikige chétilghanliq sewebidin yene bir dangliq xitay toqumichiliq guruhining mehsulatlirini chekligen. Buning bilen amérika ana weten xewpsizliki ministirliqining “Uyghur mejburiy emgikining aldini élish qanuni” boyiche, mehsulatlirining amérika bazirigha kirishini chekligen xitay shirketlirining sani 78 yétip barghan.

Amérika ana weten xewpsizliki ministirliqi qarmiqidiki tamozhna we chégra qoghdash idarisining 31-öktebir élan qilghan bayanatida, 1-noyabirdin bashlap xitayning xongkongni baza qilghan “Yida guruhi” (Esqual Group)we uning tarmaq shirketliridin “Gu'angdung yida toqumichiliq cheklik hessidarliq shirkiti”, “Turpan yida toqumichiliq hessidarliq cheklik shirkiti” qatarliqlarning mehsulatlirining amérikagha kirishini cheklen'gen.

Amérika tamozhna we chégra bashqurush idarisining qeyt qilishiche, buninggha qoshumche “Yida guruhi” ning Uyghur élidiki yene bir tarmaq shirkiti bolghan “Sanji yida toqumichiliq hessidarliq cheklik shirkiti” dawamliq cheklesh tizimlikidin orun alghan bolsimu, lékin bu shirket cheklesh tizimlikining bir tarmiqidin chiqirilip, yene bir tarmiqigha qoshulidiken. “Yida guruhi” özining Uyghur mejburiy emgikige chétishliq ikenlikini izchil ret qilip kelgen bolsimu, emma amérika ana weten xewpsizliki ministiri alixandro mayorkas, gumandarlarni dawamliq jawabkarliqqa tartidighanliqini éytqan.

Mayorkas mundaq dégen: “Biz bügünki cheklesh tizimlikini kéngeytish arqiliq, amérika karxanilirining teminlesh zenjirini toghra mölcherlishi, mejburiy emgektin wasitilik yaki biwasite paydilanmasliqini kütimiz. Ministirliqimiz ‛Uyghur mejburiy emgikining aldini élish qanuni‚ni dawamliq keskin ijra qilidu. Biz bu arqiliq kishilik hoquqni, bazarning erkin hem adil bolushini qoghdap, xilapliq qilghuchilarni jawabkarliqqa tartishta dawamliq ching turimiz.”

Amérika ana weten xewpsizliki ministirliqi “Yida guruhi” ning “Sanji yida toqumichiliq hessidarliq cheklik shirkiti” ni 2022-yiki qarar tizimlikke kirgüzgen idi.