Хитай тор қанили мәсут өзил сәвәблик тохтитип қоюлған «арсенал» ниң мусабиқисини қайта қоюшқа башлиған

Мухбиримиз әркин
2019-12-27
Елхәт
Пикир
Share
Принт

Хитай аммиви тор қанили PPTV германийә путбол чолпини мәсут өзилниң уйғурлар һәққидики сөзи сәвәблик тохтитип қоюлған әнглийә «арсенал» путбол кулубиниң мусабиқисини қайта қоюшқа башлиған.

«Вол-стерет журнили» гезитиниң хәвәр қилишичә, PPTV «арсенал» ниң мусабиқисини қайта қойған болсиму, лекин путбол мулаһизичиси пүткүл мусабиқидә мәсут өзилниң исмини пәқәт тилға алмиған.
Мәсут өзил 13‏-декабир күни тиветтер, фейсбук, инстиграм қатарлиқ таратқуларда пикир йезип, уйғурларға һессидашлиқ қилидиғанлиқини ипадилигән шундақла мусулман әллириниң уйғурлар учраватқан зулумға сүкүт қиливатқанлиқини әйиблигән иди. У «)хитайда( қуран көйдүрүлмәктә, мәсчитләр тақалмақта, мәдрисиләр чәкләнмәктә, диний затлар өлтүрүлмәктә. Буниңға қаримай мусулманлар сүкүт қилмақта» дәп язған иди.
Өзилниң сөзи райондики 2 милйондәк мусулман тутқунлар қамалған лагерларни «кәспий тәрбийәләш мәркәзлири» дәп ақлаватқан хитай һөкүмити вә хитай тор абунтлириниң қаршилиқиға учриған. «Мәсут өзил хитайда қарши елинмайдиған адәм,» дәп елан қилинған. Хитайдики қаналлар «арсенал» ниң мусабиқисини тарқитишни тохтатқан иди. Лекин «вол-стерет журнили» гезитиниң хәвиридә қәйт қилинишичә, PPTV ‏26-декабир күни туюқсиз арсенал билән боренмос кулубиниң мусабиқисини тарқитиши хитай тор абунтлирини һәйран қалдурған. Бәзи абунтлар PPTV ниң пикир тахтисиға хәт йезип, мәзкур тор қанилини тәнқидлигән.
Мәсут өзил уйғурлар һәққидики сөзи сәвәблик хитай һөкүмити вә хитай тор абунтлириниң һуҗумиға учриған болсиму, лекин у америка ташқий ишлар министирлиқи вә кишилик  һоқуқ тәшкилатлириниң қоллишиға еришкән. Америка ташқий ишлар министири майк помпейо мәсут өзилни қоллайдиғанлиқини билдүрүп, хитай компартийәси мәсут өзилни хитайдики мәстанилиридин айриветәлисиму әмма хитай «уйғурлар вә башқа диний етиқадларға қарита садир қиливатқан еғир кишилик һоқуқ дәпсәндичиликлирини дунядин йошуралмайду» дегән. Мәсут өзилниң сөзи йәнә йеңи зеландийә зәйтун топ чолпини соний бил виллиямисниң қоллишиға еришкән иди.
Пикирләр (0)
Share
Толуқ бәт