Mikrosoft bezi xizmetchilirining xitaydin bashqa döletke köchüshini telep qilghan

Washin'gtondin muxbirimiz jewlan teyyarlidi
2024.05.17

30 Nechche yildin béri xitayda soda qilip kéliwatqan mikrosoft shirkiti yéqinda bir qisim xizmetchilirini bashqa döletke köchüshke seperwer qilghan. Xitay metbu'atlirining xewer qilishiche, mikrosoft az dégende 100 adimini bashqa dölette ishleshke ündigen.

Amérika CNN torining 16-may küni bu heqte bergen xewiride éytilishiche, amérikaning sün'iy eqil we yéshil énérgiye sahesidiki eqliy mülük hoquqi bilen xitayning uni oghrilash qilmishi otturisidiki ziddiyet künséri ötkürlishiwatqan bolup, mikrosoft shirkiti buningdin tartidighan ziyanni aldin mölcherligen bolushi mumkin iken. Nöwette, mikrosoftning aliy téxnika xadimliri, bolupmu bulut hésablash téxnikisi xadimliri amérika, awstraliye, irélandiye qatarliq döletlerde xizmet qilish pursitige érishken.

“Wol-stért zhurnili” ning 16-may küni bergen xewirige qarighanda, mikrosoft shirkiti xitayda ishlewatqan, xitay puqrasi bolghan, bulut hésablash téxnikisi we sün'iy eqil téxnikisi bilen meshghul boluwatqan 800 ge yéqin xadimigha xet yollap, ularning bashqa dölette xizmet qilishini telep qilghan. Xadimlar bir ay ichide köchüp bolushi kérek iken, köchmeslikni tallisimu bolidiken.

Melum bolushiche, mikrosoft shirkiti 1992-yil xitaygha kirgen bolup, nechche on yildin buyan béyjingdiki “Asiya yumshaq détal sinaq merkizi” de pa'aliyet qilip kelgen hemde ta hazirghiche xitay bilen izchil hemkarliship kelgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.