Ürümchide 900 din artuq saqchi botkisi qurulushqa bashlidi

Xitayning shinjang xewerler torining ötken heptidiki xewiridin melum bolushiche, bu yil 10-aydin bashlap ürümchi kochilirida “Ammigha qulayliq saqchi qarawulxanisi” namida saqchi botkiliri qurulghan. Xewerde tilgha élinishiche, deslep qurulghan qarawulxanilar jenubiy poyiz istansisi etrapidiki kochilargha qurulghan bolup, ürümchi shehirining herqaysi kochilirida qurulidighan saqchi botkilirining sanini 949 gha yetküzüsh pilanlan'ghan.

Ürümchi sheherlik saqchi idarisi amanliq saqlash etritining mu'awin bashliqi wén lung bu xil “Saqchi botkiliri” toghriliq xitayning shinjang géziti muxbirining mexsus ziyaritini qobul qilip, saqchi botkilirida 24 sa'et nöwette turush yolgha qoyulghanliqini, bu botkilarning ürümchi sheher ahalisining “Xatirjemlikni saqlash, qanun bilimlirini teshwiq qilish, ammigha qulayliq yetküzüsh” meqsitide qurulghanliqini bildürgen, we mezkur botkilar qurulghandin kéyin kochida yüz béridighan, oghriliq, yanchuqchiliq qilmishlirini melum qilishqa asanliq tughulghanliqini, saqchilarning tuyuqsiz yüz bergen weqelerni derhal bir terep qilishigha qulayliq yaritilghanliqini alahide tekitligen.

Emma chet'ellerdiki Uyghur teshkilatliri, kishilik hoquq teshkilatliri we Uyghur weziyitini közitip kéliwatqan siyasiy weziyet analizchiliri, xitay da'irilirining bu xil tedbirliri, Uyghurlarning hökümetke bolghan naraziliqi sewebidin tuyuqsiz yüz bérish éhtimali bolghan qarshiliq weqelirining aldini élish, Uyghurlargha heywe qilish, xitay köchmenlirining amanliqini qoghdash we ularni xatirjem qilish üchün ikenlikini ilgiri sürmekte.