Uyghur élidiki gösh ishlepchiqirishi téz sür'ette ashurulmaqta

Xitayning “Tengritagh tori” qatarliq hökümet taratquliri 29- féwraldiki xewerliride, 2023-yili ichide Uyghur élining gösh, tuxum we süt ishlepchiqirish miqdarining aldinqi oxshash mezgildikidin zor derijide ashqanliqini xewer qilghan.Xewerde déyilishiche, rayondiki gösh ishlepchiqirish miqdari tunji qétim ikki milyon tonnidin ashqan bolup, uning éshish nisbiti pütün xitaydiki gösh ishlepchiqirishining éshish nisbitidin ikki hesse köp bolghan. Xitay taratquliri buni tentene qilip “Kishilerning gösh yéyish erkinliki téximu muqim kapaletke ige boldi” dep yazghan.

Melum bolushiche, nöwette Uyghur élidiki qoy sani we qoy göshi ishlepchiqirishi xitay boyiche ikkinchi orunda, kala sani we kala göshi ishlepchiqirishi xitay boyiche 5-orunda turidiken. Emma ijtima'iy taratqulardiki köpligen uchurlar yéqindin buyan Uyghur diyarida qoy we kala göshi bahasining shiddet bilen ösüp kétiwatqanliqini, adettiki Uyghur ahalisining bazardin gösh élip yéyishining asan emeslikini körsitiwatqanliqi melum. 

Xewerde déyilishiche, da'iriler bundin kéyin Uyghur ilida kala we qoy göshi ishlepchiqirishni asas qilish, gösh we süt mehsulatliri ishlepchiqirish iqtidarini ashurush üchün baqmichiliqni kücheytidiken we yenimu köplep baqmichiliq rayonlirini berpa qilidiken. Shunga nöwette bu xil baqmichiliqning teminlesh obyékti xitay ölkiliridiki ahale boluwatqanliqi algha sürülmekte. 

Xitay hökümet taratquliri xewerliride buning déhqan-charwichilarning kirimini ashuridighanliqini ilgiri sürsimu, biraq uning rayon ékologiyesige élip kélidighan tesiri heqqide toxtalmighan.Xitay hökümiti Uyghur élini xitayning ashliq bixeterlikige kapaletlik qilishtiki bazisi qilip békitkendin buyan, Uyghur ilida ashliq, gösh, méwe-chiwe qatarliqlarni ishlepchiqirish hessilep ashmaqta. Uyghur éli ékologiyesining buninggha qanchilik berdashliq béreleydighanliqi chet ellerdiki közetküchiler diqqet qiliwatqan mesile bolup qalghan.