Хитай һөкүмити "ши җинпиң идийәси" ни хитай асасий қануниға киргүзмәкчи

Шинхуа агентлиқиниң 19-январдики хәвиригә қариғанда, мушу айниң 18-19-күнлири бейҗиңда ечилған хитай компартийисиниң 19-қурултийи 2-нөвәтлик омумий йиғинида, "ши җинпиңниң йеңи дәврдики җуңгочу сотсиялизм қуруш идийәси" ни хитай асасий қануниға киргүзүш музакирә қилинған.

Ши җинпиң тәхткә чиққандин буян униң барлиқ һоқуқни өз қолиға мәркәзләштүрүп, хитайда һакиммутләқлиқ сиясий түзүлмини бәрпа қилғанлиқи хәлқара таратқуларда сөз темиси болуватқан бир мәзгилдә хитай даирилириниң аталмиш "ши җипиң идийиси" ни хитай асасий қануниға киргүзмәкчи болғанлиқи хәлқара таратқуларда җиддий диққәт қозғиди.

Ройтерс, фирансийә радийоси, б б с қатарлиқ таратқуларда бүгүн бу һәқтә мәхсус хәвәрләр берилди. 19-январ күни ройтерс агентлиқи "хитай ши җинпиң идийисини асасий қанунға киргүзмәкчи" сәрләвһилик мақалә елан қилинди. Фирансийә радийоси тарқатқан хәвәрдә "әгәр ши җинпиң идийиси хитай асасий қануниға киргүзүлсә, нөвәттә хитай компартийисиниң баш секретарлиқ вәзиписини өтәватқан ши җиңпиң мавзидоңдин кейин "идийиси" хитай асасий қануниға киргүзүлгән 2-шәхс болуп қалиду" дейилди. 

Б б с агентлиқиниң бу һәқтики хәвиридә "хитай 1982-йилдин буян 4 қетим асасий қануниға түзитиш киргүзди. Хитай асасий қанунида пәқәт мавзидоң вә диң шавпиңниңла исми бар, җяң земинниң ‹3 кә вәкиллик қилиш' идийиси асасий қанунға киргүзүлгән болсиму, әмма униң исми йоқ иди. Бу қетим ши җинпиңниң ‹йеңи дәврдики җуңгочу сотсиялизм қуруш идийиси' хитай асасий қануниға униң өз исми билән киргүзүлмәкчи," дейилди.

Бултур 10-ай мәзгилидә хитай компартийиси 19-қурултийиниң 1-нөвәтлик йиғинида "ши җинпиңниң йеңи дәврдики җуңгочу сотсиялизм қуруш идийиси" хитай компартийисиниң низамнамисигә киргүзүлгәнлики җакарланған иди. Шуниңдин буян пүткүл хитай миқясида "ши җинпиң идийиси" ни өгиниш давамлишип кәлмәктә.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар