Xitayda amérikagha kim pirézidént bolmisun amérika-xitay munasiwiti yaxshilanmaydu dégen qarash höküm sürmektiken

Amérika puqraliri 5-noyabir küni omumiy xelq bilet tashlap, kéler nöwetlik amérika pirézidéntini saylaydu. Nöwette saylam ishliri axirqi riqabet basquchigha kirgen bir mezgilde, amérika-xitay munasiwiti qiziq nuqtilarning biri boluwatqan bolsimu, emma xitayda jumhuriyetchi yaki démokratchi namzatlarning qaysisi utmisun, amérika-xitay munasiwetning yaxshilinishida yenila chong ümid yoq, dep qaralmaqta iken.

Amérika simliq xewerler tori CNN ning bildürüshiche, xitay taratquliridiki amérika pirézidént saylimigha da'ir xewerler kishilerge bu xil tesiratni bergen. Xewerde buninggha xitaydiki siyaset belgiligüchilerdin tartip adettiki awam puqralarghiche bolghan keng ammida, amérikagha meyli kim pirézidént bolmisun, amérika hökümitide xitayning bash kötürüshini chekleshtin ibaret ortaq pikir birliki bar, dégen qarash seweb bolghanliqini bildürgen.

CNN Ning éytishiche, bezi mutexessisler xitayda kishilerning “Saylamda kim utup chiqmisun, amérika-xitay munasiwetliri yaxshilanmaydu” dep qaraydighanliqini körsetse؛ yene beziler “Amérikaning xitay siyasitidiki izchilliqi kelgüside her qandaq chong özgirishning bolushigha bésim peyda qilidu” dep körsetken. Xewerde, béyjing da'iriliri amérikaning nöwettiki pirézidént saylimigha ashkara baha bérishtin éhtiyat qilsimu, emma trampning amérika-xitay munasiwetlirige téximu éniqsizliq élip kélidighanliqi؛ uning barliq xitay mehsulatlirigha 60 pirsent tamozhna béji qoyushni otturigha qoyghanliqi؛ béyjingning siyaset chembirikidiki yuqiri derijilik shexslerning trampni kamala xarrisqa qarighanda xitay bilen bolghan munasiwetke téximu keskinlik peyda qilidu, dep qaraydighanliqi tekitlen'gen.

CNNNing bildürüshiche, eger kamal xarris saylansa pirézidént baydénning yolini tutup, xitayning téxnologiye we herbiy tereqqiyatigha bésim ishlitishni dawamlashturushi, shuning bilen bir waqitta xitay bilen bolghan alaqe we diyalogni dawamlashturushi mumkin iken. Xewerde, bir xitay mutexessisining kamala xarris amérika-xitay munasiwitige “Jiddiylik, sürkilish, melum derijidiki alaqe we hemkarliq élip kélidu”, halbuki tiramp “Amérika-xitay munasiwitige téximu chong riqabet élip kélidu” dégenliki qeyt qilinmaqta.