Хитай юқири дәриҗилик сабиқ әмәлдариниң инисиму парихорлуқ җинайити билән сотланған

Хитайниң сабиқ дөләт рәиси ху җинтав мәзгилидә мәркизи комитет иш башқуруш идарисиниң мудирлиқ вәзиписини өтигән лиң җихуаниң иниси лиң җеңсе парихорлуқ җинайити билән сотланған.

Шинхуа ториниң бүгүн бу һәқтә тарқатқан учурида, лиң җеңсениң сәйшәнбә күни парихорлуқ җинайити билән сотланғанлиқи, униң икки милйон 400 миң доллар хиянәт қилған җинайитини етирап қилғанлиқи илгири сүрүлгән.

Униң акиси лиң җихуаму мәркәздики "аттин ғулиған" юқири дәриҗилик әмәлдарлардин иди. Лиң җихуа бу йил 7-айда парихорлуқ, қанунсиз һалда дөләт мәхпийәтликини қолға чүшүрүш вә әмилини суйиистемал қилиш билән әйиблинип, өмүрлүк қамақ җазасиға һөкүм қилинған иди.

Лиң җихуаниң йәнә бир қериндиши болған лиң ваңчең болса америкиға қечип кәткән болуп, хитайниң чирикликкә қарши күрәш қилиш ишханиси өзлириниң америкидин уни қайтуруп беришни тәләп қилғанлиқини билдүргән икән.

Фирансийә агентлиқиниң хәвәр қилишичә, лиң ваңчеңниң америкиға қечип кетиши лиң җихуаниң униңға хитайниң ядро қораллириниң мәхпий шифирлири қатарлиқ муһим дөләт мәхпийәтликини ейтип берип, андин уни америкиға қачурувәткәнлики һәққидики сөз-чөчәкләрниму кәлтүрүп чиқарған икән.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар