Хитайниң теңшүн қатарлиқ даңлиқ ширкәтлири пай чеки базирида еғир зиянға учриған

Мухбиримиз җәвлан
2021-07-28
Share

Хитай һөкүмитиниң "солчил инқилап" қозғап, хусусий карханилар вә ширкәтләргә зәрбә бериши нәтиҗисидә, хитайниң теңшүн, әли баба, мейтуән қатарлиқ даңлиқ учур-техника ширкәтлириниң пайлири пай чеки базирида төкмә қилип сетилип, бир күнниң ичидә нәччә йүз милярд доллар байлиқи тозуп кәткән.

CNN Хоң коң шөбиси "пул-муамилә" ториниң хәвәр қилишичә, сәйшәнбә күни (27-июл) мейтуән ширкитиниң хоң коң пай чеки базиридики пай чеки 17. 7 Пирсәнт чүшүп, дүшәнбә күнидикидин 14 пирсәнт төвәнлигән, бу мәзкур ширкәтниң пай чеки базириға киргәндин буян учриған әң еғир зийини икән. Теңшүн ширкитиниң пай чеки 9 пирсәнт чүшкән болуп, он йилдин буян әң еғир зиян тартқан күни һесаблинидикән. Әли баба ширкитиму дүшәнбә күни хоң коң пай чеки базирида зиянға учриған болуп, пай чеки 6. 4 Пирсәнт чүшүп кәткән. Шундақ қилип, теңшүн, әли баба, мейтуәнниң 48 саәт ичидә йоқатқан җәмий байлиқи 237 милярд доллардин ешип кәткән.

Хәвәрдә ейтилишичә, бу бир қанчә айдин буян хитайниң учур-техника ширкәтлири зиянға учрап келиватқан болуп, бу йил 2-айдин башлап, чәт әлдики пай чеки базириға киргән хитай техника ширкәтлириниң пай чеки чүшүп кетип, 1 тирилйон доллардин артуқ зиян тартқан, бу кишини чөчитидиған әһвал икән. Буниң асаслиқ сәвәбини хитай һөкүмитиниң солчил, тәтүр сияситидин көрүшкә болидикән; чүнки хитай һөкүмити йиллардин буян дөләт карханилирини қоллап, хусусий карханиларни тизгинләш, хусусий карханиларни шилип, дөләт карханилириға ярдәм қилиш сиясити қоллиниватқан болғачқа, бу вәзийәттә теңшүән, әли бабаға охшаш хусусий карханиларға болған ишәнч төвәнләп, пайчикларниң бу ширкәтләрниң пайлирини төкмә қилип сетиш әһвали көрүлгән.

Униңдин башқа, хоңкоң хеңшең пай чеки индексида бу икки һәптә еғир төвәнләш көрүлгәндин кейин, хоңкоң доллириниң қиммитиму бу йил 4-айдин буянқи әң төвән нуқтиға чүшүп қалған. Хең шең индекси бу һәптиниң дүшәнбә, сәйшәнбә күнила 8 пирсәнт төвәнлигән, бу айда болса 13 пирсәнт төвәнлигән, бу 2011-йил 9-айдин буянқи әң начар аламәт икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт