Amérika fédératsiye tekshürüsh idarisining bashliqi xitayning amérikadiki “Saqchi ponkitliri”gha hushyar bolush kéreklikini bildürgen

Ruytrés agéntliqining xewer qilishiche, amérika fédératsiye tekshürüsh idarisi (FBI) ning bashliqi kristofir wray (Cristopher Wray) 17-noyabir küni parlamént ezalirigha qilghan sözide, “Xitay hökümitining amérika sheherliride qanunsiz ‛saqchi ponkiti‚ qurup, amérikagha tesir körsitish herikitini qanat yaydurushidin qattiq endishe qiliwatimiz. Men bu ponkitlarni bilimen we ulargha küchlük diqqet qiliwatimen. Emma manga köre, xitay saqchilirining dukan échishqa urunushi kishini tolimu ghezeplendüridu, bu qilmishlar edliye we qanun ijra qilish da'irisidin halqip ketti” dégen. Xitayning washin'gitondiki bash elchixanisi bu toghriliq héchqandaq baha bermigen.

Yawropadiki “Qoghdighuchilar” namliq kishilik hoquq teshkilati 9-ayda doklat élan qilip, nyu-york qatarliq dunyaning herqaysi jayliridiki on nechche sheherde xitayning “Saqchi mulazimet ponkiti” barliqini ashkarilighanidi.

Doklatta bildürülüshiche, bu ponkitlar chet eldiki bir qisim xitay puqraliri yaki ularning tughqanlirigha bésim ishlitidiken؛ shundaqla  xitayning tesir küchi we teshwiqatini chet ellerge tarqitishqa mes'ul bolghan xitay birliksep bölümining ishlirigha maslishidiken. Kristofér  wrayning bildürüshiche, amérika xitay hökümitining xitay rehbiri shi jinpinggha qarshi kishilerge parakendichilik sélish, ularning izigha chüshüsh, ularni nazaret qilish we ulargha qara chaplash qatarliq qilmishlirini eybligen.

Bu yil öktebirde amérika yette xitay puqrasining bir amérika puqrasi we uning a'ilisini nazaret qilghanliqi we parakendichilik salghanliqi üchün eyibligen bolup, xitay hökümiti ularning ichide birsini xitaygha qayturup kétishke urun'ghan. Xitay hökümining amérikada adem tutushqa urunushi, amérika qanun orunliri teripidin “Tülke herikiti” dep atalghan.