Америка тор һуҗуми сәвәбидин хитайниң “бейҗиң йоңшин җичең технологийә гуруһи” ни җазалиған

Америка һөкүмити өткән җүмә күни, йәни 3-январ күни хитайниң “бейҗиң йоңшин җичең технологийә гуруһи һәссидарлиқ чәклик ширкити” ни “флакс тәйпиң” намлиқ даңлиқ хитай хаккерлар гурупписиниң арқисидики күч, дәп җазалиған.

Америка ташқий ишлар министирлиқи бу һәқтики баянатида, “бейҗиң йоңшин җичең технологийә гуруһи һәссидарлиқ чәклик ширкити” ниң хитай дөләт хәвпсизлик министирлиқиға бағлиқ зор көләмлик хитай һөкүмитиниң бир һөддигәрлик ширкити икәнлики, бу ширкәтниң хаккерлириниң бейҗиңниң көрсәтмиси бойичә һәрикәт қилип, америка вә чәт әлниң һалқилиқ ул әслиһәлирини һуҗум нишан қилип кәлгәнликини билдүргән. Ройтерс агентлиқиниң билдүрүшичә, буниңдин илгири ғәрб һөкүмәт әмәлдарлири бейҗиңни база қилған бу ширкәтни “флакс тәйпиң” хаккерлар гурупписиниң арқисидики күч, дәп әйибләп кәлгән икән.

Америка федератсийә тәкшүрүш идарисиниң башлиқи кристофер рей өткән йили 9-айда, бу ширкәтни “хитайниң һөкүмәт хәвпсизлик органлириға истихбарат топлаш вә развитка паалийәтлирини елип бериш” билән әйиблигән иди. Ройтерс агентлиқиниң билдүрүшичә, өткән йили охшаш вақитта елан қилған бир доклаттиму, америка, әнгилийә, австралийә, канада вә йеңи зеландийә тор әмәлдарлири “бейҗиң йоңшин җичең технологийә гуруһи һәссидарлиқ чәклик ширкити” ниң йәр шари бойичә 250 миңдин артқ әслиһәгә суқунуп киргәнликини әйиблигән икән. Лекин хитай һөкүмити америка вә униң иттипақдашлирини “бейҗиң йоңшин җичең технологийә гуруһи һәссидарлиқ чәклик ширкити” вә “флакс тәйпиң” вәқәсидә “һәқсиз йәкүн” чиқирип, хитайни “асассиз әйибләш” билән тәнқид қилған.

Американиң “бейҗиң йоңшин җичең технологийә гуруһи” ға йүргүзгән ембарго қарари, америка малийә министирлиқи йеқинда бир хитай хаккерлар гурупписиниң мәзкур министирлиқниң тор бетигә суқунуп кирип, нурғун һөҗҗәтләрни оғрилап кәткәнлики, бу һуҗумниң министирлиқ ембарго ишханисини нишан қилғанлиқини билдүрүшиниң арқисидин йүргүзүлгән.