Istanbulda général memet riza békinni xatirilesh yighini ötküzüldi

Muxbirimiz erkin tarim
2015.02.22
memet-reza-bekin.jpg Général memet riza békin
RFA/Erkin Tarim


Türkiyening istanbul shehiride sherqiy türkistan wexpining qurghuchi ezaliridin biri, Uyghur général merhum memet riza békinning wapat bolghanliqining 5 - yilliqi munasiwiti bilen xatirilesh yighini ötküzüldi. 2 - Ayning 21 - küni istanbulning aqsaray rayonidiki girant inka méhmanxanisida ötküzülgen bu pa'aliyetke sabiq parlamént ezasi péshqedem siyasetchi newzat yalchintash ependi, idil - ural türkistan wexpi bashliqi tülay duran xanim, tonulghan tarixchi proféssor gülchin chandarli xanim, merhum général memet riza békinning dostliri, izmir we enqere qatarliq jaylardin kelgen Uyghurlar, uning qizi, oghli we newrisi bolup 100 etrapida kishi qatnashti. Yighin qur'ani kerim tilaweti bilen bashlandi. Général memet riza békinni xatirilesh yighinigha tarixchi proféssor abdulqadir donuq riyasetchilik qildi. U yighinda sözleydighanlarni sözge teklip qilishtin burun, qisqa nutuq sözi qilip mundaq dédi:

Sherqiy türkistan dewasining yol bashchiliridin biri, türkiye jumhuriyiti döliti we sherqiy türkistan dewasi üchün zor xizmetlerni qilghan, 25 yil boyiche sherqiy türkistan wexpining bashliqliq wezipisini ötigen rehmetlik général memet riza békinning wapat bolghanliqining 5 yil bolghanliqini xatirilesh üchün bu yerge jem bolduq. Yighinimizning muweppeqiyetlik ötüshini tilesh bilen birlikte, sherqiy türkistanning musteqilliqi yolida jénini pida qilghan pütün shéhitlerning yatqan jayining jennet bolushini allahdin tileymen.

Istanbulda ötküzülgen Uyghur général memet riza békinni xatirilesh yighinida sabiq parlamént ezasi newzat yalchintash ependi général memet riza békinning kéyinki 25 yil ichide sherqiy türkistan dewasigha qoshqan töhpisi toghrisida toxtaldi. Izmir ege uniwérsitéti türk dunyasi tetqiqat merkizi oqutquchisi proféssor alimjan inayet ependi bolsa merhum général memet riza békinning türkiyede Uyghur oqughuchilarni oqutush xizmetliri üstide toxtaldi. Proféssor alimjan inayet ependi özini sherqiy türkistan wexpining oqutqanliqini, général memet riza békin yardem qilmighan bolsa özining türkiyege kélelmeydighanliqini bayan qildi. Général memet riza békinning Uyghur oqughuchilarni türkiyege élip kélip oqutush xizmitige qoshqan töhpisining zor ikenlikini tekitlidi.

Arqidin beykent uniwérsitéti oqutquchisi doktor meghfiret kamal yunusoghlu xanim merhum général memet riza békinning 85 yilliq hayati we ish - izliri toghrisida melumat berdi. Merhum général memet riza békinning 9 yashta wetinidin ayrilghanliqini, türk armiyeside xizmet qilghanliqini, ömrining kéyinki 25 yilida sherqiy türkistan üchün xizmet qilghanliqini éytti. Türkiyede Uyghur oqughuchi terbiyelesh xizmitige zor töhpilerni qoshqanliqini bayan qilip ötti.

Arqidin sherqiy türkistan weqpining sabiq bash katipi xamit göktürk ependi, général memet riza békinning weqip bashliqi bolup ishligen 25 yil jeryanida qilghan xizmetliri toghrisida toxtaldi.

Merhum memet riza békin 1925 - yili xotende tughulghan. 9 Yash waqtida a'ilisi bilen birlikte wetinidin ayrilghan. U, merhum memet emin bughraning ayalining inisidur. U türkiye quruqluq armiye mektipini aliy netije bilen püttürgen. 1950 - Yillarda türkiye qoshunida koriye urushigha qatnashqan.

Merhum, amérika we gérmaniye qatarliq döletlerde türkiyining herbiy we istixbarat xizmetlirini ishligen. U shimali atlantik okyan ehdi teshkilatidimu wezipe ötigen. 1985 - Yili türkiye armiyisidin général unwani bilen pénsiyige chiqqan.

Merhum 1990 - yillardin kéyin sherqi türkistan milliy qurultiyi, sherqi türkistan wexpi qatarliq teshkilatlarda re'is, mu'awin re'is we pexriy re'is bolup wezipe ötigen.

Merhum bundin 5 yil burun, yeni 2010 - yili 2 - ayning 15 - küni enqerede közini yumghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.