Rusiyilik tarixchi sérgéy klyashtorniy Uyghurlar heqqide tetqiqatini yenimu dawam qilmaqta

Öz waqtida Uyghurlar tarixi köpligen ataghliq alimlarning diqqet merkizide bolghanliqi hemde bu heqqide nurghunlighan emgeklerning yoruq körgenliki melumdur. In'gliz, némis, fransuz, rus we bashqimu tetqiqatchilar Uyghurlarning uzun tarix we bay medeniyetke ige ikenlikini hazirghiche üzlüksiz tekitlep kelgen idi.

Bu yönilishte bolupmu rusiye impériyisi, shundaqla sabiq sowét ittipaqi alimliri jiddiy ishlep, Uyghurlarning peqet tarixila emes, belki étnografiyisi, tili, edebiyati, medeniyiti boyiche bibaha emgeklerni yézip qaldurup ketti. Ularning beziliri hazirmu shu témini dawam qilip, Uyghurlarning téxi pütünley üginilmigen yaki yéterlik derijide tetqiq qilinmighan sahelirini üginishni dawam qilmaqta. Ene shularning biri tarixchi, sherqshunas alim sérgéy klyashtorniydur.

S. Klyashtorniy ellik yildin oshuq waqit mabeynide türkiy xelqlerning, jümlidin Uyghurlarning qedimiy we ottura esir tarixini, yazma yadikarliqlirini tetqiq qilip, bir qatar salmaqliq emgeklerni neshr qilghan alimdur. U “Qedimiy türk runik yadikarliqliri ottura asiya tarixi boyiche menbe süpitide”, “Merkiziy asiya tarixi we runik yéziqi yadikarliqliri“, “Uyghur qaghanliqining runik yadikarliqliri we yawro'asiya dalaliri tarixi” qatarliq bir qanchilighan kitablarning aptoridur. Hazir u rusiye penler akadémiyisi sherqshunasliq institutining sankt - pétérburgtiki bölümide, shundaqla bir qatar aliy mekteplerde ishlewatmaqta.

Rusiyining sankt - pétérburg shehiride istiqamet qiliwatqan 85 yashliq sérgéy klyashtorniy radi'omiz ziyaritini qobul qilip, rusiye Uyghurshunasliq ilimining bügünki ehwali heqqide qarashlirini otturigha qoydi.