Қазақистанда миллий армийә қоманданлиридин бири зунун тейипоф хатириләнди

Мухбиримиз үмидвар
2017-09-24
Share
Zunun-teyipof.jpg Миллий армийә 5-корпусқа өзгәртилгәндин кейинки командирларниң сүрити. Оңдин иккинчи киши сабиқ шәрқий түркистан җумһурийити миллий армийисиниң муавин баш қомандани зунун тейипоф. 1950-Йили, ғулҗа.
RFA/Oyghan

Йәкшәнбә, йәни 24-сентәбир күни қазақистанниң алмата шәһиригә җайлашқан қазақистан җумһурийәтлик уйғур академийәлик тиятириниң залида 1944-1949-йиллиридики миллий азадлиқ инқилабиниң рәһбирий әрбаблиридин бири, миллий армийиниң муавин баш қомандани, миллий армийә полковники зунун тейипоф туғулғанлиқиниң йүз йиллиқини хатириләш паалийити болуп өтти.

Мәзкур мурасим залиға зунун тейипофниң генераллиқ һәрбий формиси кийгән чоңайтилған сүрити есилған болуп, мурасимға асаслиқи яшлар, зунун тейипофниң пәрзәнтлири вә уруқ-туғқанлири, зиялийлардин болуп 100 гә йеқин киши қатнашқан.

Мурасимда яшлар вәкиллири өзлириниң зунун тейипофниң тәрҗимиһали вә һәрбий һаятиға аит доклатлирини оқуп өткән. Мурасимда уйғур тарихчилардин бири, 1944-1949-йиллардики миллий инқилаб тарихи һәққидә бир қисим мақалиләрни елан қилған қәһриман ғоҗамбәрди доклат берип, зунун тейипофниң 1944-1949-йиллардики миллий инқилабта вә миллий армийидә ойниған ролиға юқири баһа бәргән һәм униң кейинки һаят қисмәтлири шуниңдәк миллий азадлиқ инқилабниң партлиши вә ақивити һәққидә әтраплиқ тохталған.

Йеқинқи вақитлардин буян зунун тейипоф тәвәллутиниң 100 йиллиқи мунасивити билән қазақистанда униң аилә-тавабиатлири, зиялийлар тәрипидин бир қатар паалийәтләр өткүзүлгән, шуниңдәк униң һәққидә бир қанчә парчә мақалиләр елан қилинған иди.

Зунун тейипоф 1917-йили, қазақистанниң яркәнт шәһиридә туғулған, 1930-йилларда ғулҗиға келип маканлашқан вә 1944-йили "азадлиқ тәшкилати" вә ғулҗа қозғилиңиға қатнашқан, 1945-йили 4-айдин башлап, миллий армийиниң муавин баш қомандани болған һәмдә шиху вә тарбағатай урушлириға қоманданлиқ қилишқа қатнашқан. 

Зунун тейипоф, 1949-йилидин 1960-йилиғичә "шинҗаң һәрбий райони" ниң муавин штаб башлиқи болған. У, 1961-йили совет иттипақиға кетип, алмутада яшап, кейин шу йәрдә вапат болған иди. Униңға 1955-йили, хитай азадлиқ армийисиниң генерал майорлиқ унвани берилгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт