Ақсарай алдида ачлиқ елан қилған уйғурлар америка һөкүмитидин әмәлий һәрикәт тәләп қилмақта

Мухбиримиз ирадә
2022.09.20
Share on WhatsApp
Share on WhatsApp
Ақсарай алдида ачлиқ елан қилған уйғурлар америка һөкүмитидин әмәлий һәрикәт тәләп қилмақта Хитай һөкүмитиниң уйғурларни җаза лагерлирида солап түрлүк васитиләр билән қийниши вә нөвәттә вирусни баһанә қилип уларни өйлиригә қамал қилип ач қоюшиға қарши ақсарай алдида ачлиқ елан қилған лагер шаһитлири вә паалийәтчиләр. 2022-Йили 20-сентәбир, вашингтон.
Photo: RFA

Америкадики бир қисим лагер шаһитлири вә паалийәтчиләр ақсарай алдида 19-сентәбир күни ачлиқ елан қилиш һәрикити башлиған иди. Биз уларниң бу һәрикитиниң иккинчи күнидә, йәни 20-сентәбир күни ақсарай алдиға берип, уларни алаһидә зиярәт қилдуқ.

Биз ақсарай алдиға барғанда, зумрәт давут, турсунай зиявудун, гүлзирә авулқанқизи қатарлиқ лагер шаһитлири һәмдә америка уйғур бирләшмисиниң рәиси әлфидар илтәбир вә шундақла лагерға тутулуп кәткән дадиси үчүн дава қиливатқан диляр сәйпидин қатарлиқлар ачлиқ елан қилиш һәрикитини давам қиливататти. Улар бир яқтин шуар товлап, йәнә бир яқтин уларниң ачлиқ елан қилиш һәрикитигә қизиққучиларға уйғурларниң кимлики, улар учраватқан ирқий қирғинчилиқ һәққидә мәлумат бериватқан иди.

Америка уйғур бирләшмисиниң рәиси әлфидар илтәбир, өзлириниң немә үчүн ачлиқ елан қилиш һәрикити башлиғанлиқини чүшәндүрүп өтти. У сөзидә бүгүн иккинчи күнигә қәдәм қойған бу һәрикитиниң икки мәқсити барлиқини ейтти: “бизниң ачлиқ елан қилиштики мәқситимиз, биринчидин, хитайниң уйғур елида давам қиливатқан қаттиқ қамали сәвәблик йүз бәргән уйғурларниң ачлиқ киризисиға дуняниң диққитини тартиш; иккинчидин, нөвәттә җәнвәдә давам қиливатқан б д т кишилик һоқуқ кеңишидә уйғур мәсилисиниң рәсмий оттуриға қоюш үчүн америка һөкүмитини бир қарарнамә тәйярлашқа чақириштин ибарәт.”

Хитай һөкүмитиниң уйғурларни җаза лагерлирида солап түрлүк васитиләр билән қийниши вә нөвәттә вирусни баһанә қилип уларни өйлиригә қамал қилип ач қоюшиға қарши ақсарай алдида ачлиқ елан қилған лагер шаһитлири вә паалийәтчиләр. 2022-Йили 20-сентәбир, вашингтон.

Әлфидар, өзлириниң һазирқи ачлиқ елан қилиш мәқситини мухбирлар америка һөкүмитиниң ахбарат-учур ишханиси вә бу ишханиниң баянатчилири билән алақилишиш арқилиқ, уларға йәткүзүватқанлиқини, пат арида улардин бир җаваб келишини күтиватқанлиқини ейтти.

Мәлум болушичә, ачлиқ елан қилиш һәрикитигә қатнишиватқанлар төнүгүн кечиниму ақсарай алдида өткүзгән болуп, улар бу җәрянда бир қисим қейинчилиқларға дуч кәлгән. Лагер шаһити зумрәт давут, өзлириниң аял киши болуш сүпити билән кечидә талада қелишиниң асанға тохтимиғанлиқини, әмма өзлириниң ачлиқ елан қилиш һәрикитини бир нәтиҗә чиққучә давам қилидиғанлиқини ейтти.

Лагер шаһити гүлзирә авулқанқизиму вәтәндики лагерларда қийниливатқанларниң азаби алдида өзлириниң ач қелишиниң һечнәрсә әмәсликини, шуңа бу һәрикитини изчил давам қилидиғанлиқини ейтти.

Ачлиқ елан қилиш һәрикитигә қатнашқанлар, йәниму көп кишиләрниң өзлириниң сепигә қошулушини үмид қилидиғанлиқини, бу хил әмәлий һәрикәтләр арқилиқ уйғурларниң авазини дуняға йәткүзүшкә җасарәт қилишни дәвәт қилди.

Диляр сәйпидин өзиниң лагерға қамалған дадисини қутқузуш вә уйғурлар учраватқан ирқий қирғинчилиқни тохтитиш үчүн қолидин кәлгән барлиқ чариләрни қиливатқанлиқини, йәниму көп уйғурларниң бу сәпкә қетилиши керәкликини тәкитлиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.