Нопус йөткигәнлики үчүн тутулған аилә аяли айгүл турахан 10 йиллиқ кесилгән

Мухбиримиз шөһрәт һошур
2020-04-13
Елхәт
Пикир
Share
Принт
«Диний әсәбийлик» гумани билән тутулуп, «дөләт бихәтәрликигә хәвп йәткүзүш» билән әйиблинип, 10 йиллиқ қамаққа кесиветилгән аилә аяли айгүл турахан икки нәвриси билән.
«Диний әсәбийлик» гумани билән тутулуп, «дөләт бихәтәрликигә хәвп йәткүзүш» билән әйиблинип, 10 йиллиқ қамаққа кесиветилгән аилә аяли айгүл турахан икки нәвриси билән.
Photo: RFA

Ашкарилинишичә, текәс наһийәсидин нопусини йөткигәнлики үчүн «диний әсәбийлик» гумани билән тутулған аилә аяли айгүл турахан тәкшүрүлүш давамида «қол телефони арқилиқ диний мәзмундики материялларни башқиларға тарқатқанлиқи байқалған» лиқи үчүн дөләт бихәтәрликигә хәвп йәткүзүш билән әйиблинип, 10 йиллиқ қамаққа кесиветилгән. Дәлиллинишичә, у нөвәттә ғулҗа шәһәр байкөлдики бир түрмидә җаза муддитини өтимәктә.

Вәзийәттин хәвәрдар кишиниң мәлум қилишичә, текәс наһийисидә қассаплиқ қиливатқан мәмәтәли абдуришит тиҗаритини ғулҗа шәһиридә давамлаштуруш үчүн 2010‏-йилларниң бешида аяли айгүл турахун вә оғли ширәлиләр билән бирликтә ғулҗа шәһириниң хәнбиң йезисиға көчүп кәлгән. 2017‏-Йили уйғур районида лагерларға адәм топлаш башланғанда көчмә нопустикиләр асаслиқ бир нишан болған. Нәтиҗидә мәмәтәли абдуришит аяли билән бирликтә лагерға әкетилгән. Лагердики аталмиш «тәрбийиләш» вә тәкшүрүлүш давамида айгүл турахунниң қол телефони арқилиқ аталмиш «диний әсәбийлик» мәзмундики бир материялни бир қанчә тонушлириға йоллиғанлиқи мәлум болған. Бу қилмиш «миллий бөлгүнчиликкә қутритиш» вә «дөләт бихәтәрликигә хәвп йәткүзүш» дәп қаралған. Даириләр сотсиз чиқирилған бир һөкүм арқилиқ айгүл турахунни 2019‏-йилниң бешида 10 йиллиқ қамаққа һөкүм қилған.

Телефонимизни қобул қилған хәнбиң йезилиқ сақчи хадими айгүл тураханниң қамақта икәнликини рәт қилмиди. Әмма бу хадим айгүл тураханниң немә сәвәбтин тутулған вә қандақ бир әйиблимә билән кесиветилгәнлики һәққидә мәлумат бәрмиди.

Вәзийәттин хәвәрдар киши тәминлигән нопус тизимлаш картисида қәйт қилинишичә, бу йил 4-айда айда дәл 49 яшқа киргән айгүл турахун бир мәһәл ғулҗа шәһәрлик қамақханида тутуп турулған.

Әмма айгүл турахунниң лагерға әкетилип қанчилик вақиттин кейин қамақханиға йөткәлгәнлики вә қамақханида қанчилик тутуп турулғандин кейин кесилгәнлики мәлум әмәс.

Хәнбиң йезисидики кәнт кадирлиридин бири айгүл турахунниң «дөләт бихәтәрликигә хәвп йәткүзүш» билән әйиблинип кесилгәнликини дәлиллиди. Бу хадимниң баян қилишичә, лагердики сорақта мәсилә тапшуруш давамида у өзиниң қол телефонидин байқалған диний материяллирини бирқанчә тонушиға йоллиғанлиқини иқрар қилған. Бу иқрар униң аталмиш «җәмийәт тәртипини бузуш вә қутратқулуқ» қилмишиға пакит қилинған.

Бу хадимниң баянлиридин хәнбиң йезисиниң йеңимәһәллә кәнтидә айгүл турахун билән бир вақитта бирқанчә кишиниң җаза һөкүминиң уқтурулғанлиқи мәлум. Әмма уларниң әнә ашу айгүл турахун диний материялни йоллиған кишиләр яки башқилар икәнлики мәлум әмәс.

Кәнт хадимлириниң баян қилишичә, мәмәтәли абдуришит лагерда 1 йил 4 ай ятқандин кейин қоюп берилгән. Вәзийәттин хәвәрдар кишиниң бу әһвалға асасән пәрәз қилишичә, нопус йөткәш айгүл турахунниң бир мәзгилдә лагерда йетишиға сәвәб болған. Униң кесилишигә қол телефонидики «диний материял» баһанә қилинған. Ашкарилишичә, айгүл турахун нөвәттә ғулҗа шәһәр байкүлдики бир түрмидә җаза муддитини өтимәктикән.

Пикирләр (0)
Share
Толуқ бәт