Ақсарайниң дөләт хәвпсизлик мәслиһәтчиси: америка хитайға ембарго қоюши мумкин

Мухбиримиз җүм
2020-05-24
Елхәт
Пикир
Share
Принт
Ақсарайниң дөләт хәвпсизлик мәслиһәтчиси роберт обрайен әпәнди.
Ақсарайниң дөләт хәвпсизлик мәслиһәтчиси роберт обрайен әпәнди.
Social Media

Ақсарайниң дөләт хәвпсизлик мәслиһәтчиси роберт обрайен әгәр бейҗиң хоңкоңда хәвпсизлик қанунини иҗра қилса, америкиниң ембаргосиға учриши мумкинликини билдүрди.

У, бу сөзләрни н б с телевизийәсиниң зияритини қобул қилғанда оттуриға қойди. Униң бу сөзлири хитай хоңкоңға алақидар дөләт хәвпсизлик қануни мақуллашқа тутунған мәзгилгә тоғра кәлди.

Обрайен бу қанун лайиһәсиниң хоңкоңни пүтүнләй өткүзүвелиштин дерәк беридиғанлиқини ейтти.

У йәнә хоңкоңниң хәлқара орни һәққидә тохтилип, әгәр хитай хоңкоңни пүтүнләй өткүзүвалса хоңкоңниң хәлқаралиқ пул-муамилә мәркизи болуш салаһийитини сақлап қелиши гуманлиқ икәнликни билдүрди.

У, хоңкоңниң қанун билән идарә қилинидиғанлиқи, хоңкоңда әркин базарниң капаләткә игә қилинғанлиқи, шу сәвәблик нурғун пул-муамилә саһәсиниң хоңкоңни макан тутқанлиқини ейтти. 

У мундақ деди: «әгәр буларниң һәммиси йоқалса, пул-муамилә саһәсиниң йәнә хоңкоңда туралайдиған туралмайдиғанлиқиға бирнәрсә дейәлмәймән. Әгәр хоңкоң хитай хәлқ җумһурийити вә коммунистик партийә тәрипидин башқурулидиған болса улар у йәрдә турмайду.» 
Хитайниң хоңкоңға мунасивәтлик дөләт хәвпсизлик қануни бу нөвәтлик «икки қурултай» мәзгилидә тонуштурулған вә бу қанунниң мақуллуқтин өтидиғанлиқи мөлчәрләнгән.

Бу қанун мақуллинип хоңкоңда иҗра қилинса, хоңкоңлуқлар йиллардин буян бәһрилинип кәлгән, пикир, йиғилиш вә ахбарат әркинлики қатарлиқ негизлик әркинликләрниң пүтүнләй чәклинидиғанлиқи, мушуниңға алақидар бәзи һәрикәтләрниң җинайәт шәкилләндурдиғанлиқи илгири сүрүлгән. 

Бу һәқтә тохталған роберт обрайен, әгәр бу қанун иҗра қилинса хоңкоңниң алий аптономийәсини сақлап қалалмайдиғанлиқини, нәтиҗидә америкиниң өткән йили мақуллиған «хоңкоң демократийә қануни» ни ишқа селип хитайға ембарго йүргүзидиғанлиқини ейтти.

Пикирләр (0)
Share
Толуқ бәт