Балилиридин хәвәр алалмайватқан анилар әнқәрәдә ахбарат елан қилиш йиғини өткүзди

Ихтиярий мухбиримиз азиғ
2021-03-29
Share
Балилиридин хәвәр алалмайватқан анилар әнқәрәдә ахбарат елан қилиш йиғини өткүзди Хитай һөкүмитиниң тосқунлуқи сәвәблик балилири һәққидә учурға еришәлмәй кәлгән анилар әнқәрә улус мәйданида ахбарат елан қилиш паалийити елип барди. 2021-Йили 27-март, түркийә.
RFA/Azigh

Хитайниң йиғивелиш лагери түзүми вә ирқи қирғинчилиқ сиясити сәвәблик йиллардин буян балилиридин хәвәр алалмайватқан уйғур анилар авазини дуняға аңлитиш үчүн 8-март күни истанбулдин әнқәрәгә қарап йолға чиққаниди.

18-Чесила әнқәрәгә йитип кәлгән уйғур анилар балилириниң из-дерикини қилиш йолида бир қатар паалийәтлирини елип бармақта.

27-Март күни хитай һөкүмитиниң тосқунлуқи сәвәблик балилири һәққидә учурға еришәлмәй кәлгән анилар әнқәрә улус мәйданида ахбарат елан қилиш паалийити елип барди. Паалийәткә көп санда йәрлик ахбарат васитилири вә түркийәдә турушлуқ чәтәллик мухбирлар қатнашти.

Анилар ахбарат васитилириниң зияритини қобул қилип балилири үчүн күрәш қилиштин тохтап қалмайдиғанлиқини, балилири билән қайтидин җәм болғучә адаләт тәләп қилиштин ваз кәчмәйдиғанлиқини билдүрүшти.

Паалийәткә қатнашқан анилардин судунниса аблитип вә мәрйәм ханим ханим зияритимизни қобул қилип паалийәт һәққидә тәпсилий тохталди.

25-Март күни, балилири һәққидә хәвәр алалмайватқан уйғур анилар хитай әлчиханисиға берип түркийәгә зиярәткә кәлгән хитай ташқи ишлар министири ваң йи билән көрүшүшни тәләп қилған. Анилар 25-март күни хитайниң әнқәрәдики баш әлчиханисиниң алдиға берип илтимаслирини тапшурушқа теришқан болсиму әлчихана тәрипидин қобул қилинмиған вә хәвпсизлик хадимлириниң тосқунлуқи сәвәблик әлчиханиға йеқинлишиши имканийити болмиған.

27-Март елип берилған ахбарат елан қилиш йиғинида уйғур анилар хитай ташқи ишлар министири ваң йи билән көрүшүш тәлипини тәкрар оттуриға қойған болуп, хитай һөкүмити бүгүнгичә лагер қурбанлири йеқинлири вә васитилик зиянкәшликкә учриған кишиләрниң көрүшүш вә диалог қуруш тәклипини рәт қилип кәлмәктә.

Мәрйәм ханим зияритимиз җәрянида, хитай ташқи ишлар министири билән көрүшүш тәклипиниң қобул қилинмиғанлиқи тоғрисида тохтилип өтти.

Анилар ахбарат елан қилиш йиғинида хитай һөкүмитидин балилирини дәрһал қоюп беришни тәләп қилиш билән бирликтә, түркийәни вә түрк хәлқини зулумға сүкүт қилмаслиққа чақирди.

18-Март истанбулдин пиядә йолға чиқип әнқәрәгә йетип кәлгән анилар истанбулда бир қатар паалийәтләрни өткүзгән болуп, 22-чесила бирләшкән дөләтләр тәшкилати көчмәнләр шөбисиниң алдида ахбарат елан қилиш паалийити өткүзгән иди. Анилар йәнә түркийәгә зиярәткә кәлгән хитай ташқи ишлар министири билән көрүшүшни тәләп қелип 25-чесила хитай әлчиханисиниң алдиға кәлгән болсиму, сақчилар тәрипидин тосувелинған вә әлчихана тәрипидин қобул қилмиғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт