Лагерда өлгән айтурсунниң аниси: «җәсәт йәрликкә елип меңилғанда биз өйимизгә солап қоюлдуқ»

Мухбиримиз шөһрәт һошур
2019-06-20
Елхәт
Пикир
Share
Принт
Лагерда өлгәнлики дәлилләңән хуа ән саяһәт ширкитиниң муавин директори айтурсун ели.
Лагерда өлгәнлики дәлилләңән хуа ән саяһәт ширкитиниң муавин директори айтурсун ели.
Photo: RFA

Уйғур аптоном районлуқ аяллар бирләшмисигә аит икәнлики илгири сүрүлгән аваз хатирисидин мәлум болушичә, хитай даирилири қизи лагерда өлгән патигүл ясинни йәнә ғовға чиқармаслиққа мақул дегүзгәндин кейин, җәсәтни униң аилисигә елип барған. Әмма җәсәт аилидә пәқәт бир саәтчә турғузулғандин кейин сақчилар һазидар мейит игилири вә қошнилирини өйигә солап қоюп чәклик сандики кадирлар биләнла мейитни зәрәткарлиққа елип кәткән. Даириләр бу өлүмгә пәқәт 25 миң йүән әтрапида төләм бәргән.

Һөрмәтлик радио аңлиғучилар, мәзкур аваз хатирисидин мәлум болушичә, айтурсунниң аниси ғовға чиқармаслиқ һәққидә вәдә бәргәндин кейин җәсәт йүндоң дохтурханисидин қәшқәр мәрһаба коча башқармисидики мәрһумниң аилисигә елип меңилған. Әмма айтурсунниң аписи қизиниң бәдән қисмини җәсәт аилисигә апирилғандин кейинму көрәлмигән. 

Биз уйғур аптоном районлуқ аяллар бирләшмисиниң бир хадими билән айтурсунниң аниси арисида өткүзүлгән сөһбәт икәнлики илгири сүрүлгән бу аваз хатириси һәққидә мәзкур бирләшмигә қайта телефон қилған болсақму, соаллиримизға җаваб алалмидуқ. Мәзкур аваз хатирисидә дейилишичә, мейитни узитишқа юрт җамаити қатнаштурулмиған. Пәтигә киргән йеқин қошнилар мейит игилири билән бирликтә өй ичигә солап қоюлған. Уларниң һойлиға чиқиши вә зәрәткарлиққа беришиға рухсәт қилинмиған. Мейитни пәқәт чәклик сандики кадир вә сақчиларла зәрәткарлиққа елип кәткән.

Аваз хатирисидин йәнә мәлум болушичә, айтурсунниң ширкәттики хизмәтдашлири, пәқәт мейит йәрликигә қоюлуп бир мәзгилдин кейинла һал сорап келәлигән. Әмма улар айтурсунниң өлүм сәвәбини сориғинида сақчиларниң тәһдитигә учриған. Хуаән ширкитиниң алақидар хадими айтурсун вапат болғандин кейин мәзкур аилини йоқлап барғанлиқини ейтти.

Мәлум болушичә, лагерда җан үзгән 34 яшлиқ муавин директор айтурсун елиниң аилисигә хитай даирилири җәмий 25 миң сом төләм бәргән. Айтурсун хизмәттики чеғида төлигән суғурта пулидин 24 миң сом қайтқан. Нәтиҗидә бир тал қизи, йәни җан-җигиридин айрилған ана патигүл ясин җәмий 49 миң сом пул тапшурувалғандин башқа һечқандақ изаһат вә мәзкур өлүм һәққидә һечқандақ бир тәпсилий учур алалмиған. Даириләр әң катта мәрһәмәт сүпитидә униң иккинчи күни қизиниң тупрақ бешини көрүп келишигә рухсәт қилған. Бу рухсәтму ғовға чиқармаслиқ вәдиси билән берилгән. 

Биз айтурсунниң лагерда өлгәнликини дәлиллигән хуаән саяһәт ширкитиниң хадимидин айтурсунниң хизмәттики мәзгилдики сиясий ипадиси һәққидә мәлумат соридуқ. Мәзкур хадим бу һәқтә җаваб беришни халимиди яки петиналмиди.

Пикирләр (0)
Share
Толуқ бәт