Lagérda ölgen aytursunning anisi: "Jeset yerlikke élip méngilghanda biz öyimizge solap qoyulduq"

Muxbirimiz shöhret hoshur
2019-06-20
Élxet
Pikir
Share
Print
Lagérda ölgenliki delillengen xu'a en sayahet shirkitining mu'awin diréktori aytursun éli.
Lagérda ölgenliki delillengen xu'a en sayahet shirkitining mu'awin diréktori aytursun éli.
Photo: RFA

Uyghur aptonom rayonluq ayallar birleshmisige a'it ikenliki ilgiri sürülgen awaz xatirisidin melum bolushiche, xitay da'iriliri qizi lagérda ölgen patigül yasinni yene ghowgha chiqarmasliqqa maqul dégüzgendin kéyin, jesetni uning a'ilisige élip barghan. Emma jeset a'ilide peqet bir sa'etche turghuzulghandin kéyin saqchilar hazidar méyit igiliri we qoshnilirini öyige solap qoyup cheklik sandiki kadirlar bilenla méyitni zeretkarliqqa élip ketken. Da'iriler bu ölümge peqet 25 ming yüen etrapida tölem bergen.

Hörmetlik radi'o anglighuchilar, mezkur awaz xatirisidin melum bolushiche, aytursunning anisi ghowgha chiqarmasliq heqqide wede bergendin kéyin jeset yündong doxturxanisidin qeshqer merhaba kocha bashqarmisidiki merhumning a'ilisige élip méngilghan. Emma aytursunning apisi qizining beden qismini jeset a'ilisige apirilghandin kéyinmu körelmigen. 

Biz Uyghur aptonom rayonluq ayallar birleshmisining bir xadimi bilen aytursunning anisi arisida ötküzülgen söhbet ikenliki ilgiri sürülgen bu awaz xatirisi heqqide mezkur birleshmige qayta téléfon qilghan bolsaqmu, so'allirimizgha jawab alalmiduq. Mezkur awaz xatiriside déyilishiche, méyitni uzitishqa yurt jama'iti qatnashturulmighan. Petige kirgen yéqin qoshnilar méyit igiliri bilen birlikte öy ichige solap qoyulghan. Ularning hoyligha chiqishi we zeretkarliqqa bérishigha ruxset qilinmighan. Méyitni peqet cheklik sandiki kadir we saqchilarla zeretkarliqqa élip ketken.

Awaz xatirisidin yene melum bolushiche, aytursunning shirkettiki xizmetdashliri, peqet méyit yerlikige qoyulup bir mezgildin kéyinla hal sorap kéleligen. Emma ular aytursunning ölüm sewebini sorighinida saqchilarning tehditige uchrighan. Xu'a'en shirkitining alaqidar xadimi aytursun wapat bolghandin kéyin mezkur a'ilini yoqlap barghanliqini éytti.

Melum bolushiche, lagérda jan üzgen 34 yashliq mu'awin diréktor aytursun élining a'ilisige xitay da'iriliri jem'iy 25 ming som tölem bergen. Aytursun xizmettiki chéghida töligen sughurta pulidin 24 ming som qaytqan. Netijide bir tal qizi, yeni jan-jigiridin ayrilghan ana patigül yasin jem'iy 49 ming som pul tapshuruwalghandin bashqa héchqandaq izahat we mezkur ölüm heqqide héchqandaq bir tepsiliy uchur alalmighan. Da'iriler eng katta merhemet süpitide uning ikkinchi küni qizining tupraq béshini körüp kélishige ruxset qilghan. Bu ruxsetmu ghowgha chiqarmasliq wedisi bilen bérilgen. 

Biz aytursunning lagérda ölgenlikini delilligen xu'a'en sayahet shirkitining xadimidin aytursunning xizmettiki mezgildiki siyasiy ipadisi heqqide melumat soriduq. Mezkur xadim bu heqte jawab bérishni xalimidi yaki pétinalmidi.

Toluq bet