Иқтидарлиқ мудир дилмурат абдуреһимниң бир йилдин буян ғулҗа шәһәрлик қамақханида сәвәбсиз тутуп туруливатқанлиқи ашкариланди

Мухбиримиз шөһрәт һошур
2022.04.20
Share on WhatsApp
Share on WhatsApp
Иқтидарлиқ мудир дилмурат абдуреһимниң бир йилдин буян ғулҗа шәһәрлик қамақханида сәвәбсиз тутуп туруливатқанлиқи ашкариланди 30 Йиллиқ маарипчилиқ һаятида ғулҗа шәһәрлик 3-, 8- вә 9-оттура мәктәпләрдә мудир болуп вәзипә өтигән иқтидарлиқ маарипчи дилмурат абдуреһим әпәнди.
Oqurmen teminligen

Мәлум болушичә, 30 йиллиқ маарипчилиқ һаятида ғулҗа шәһәрлик 3-, 8- вә 9-оттура мәктәпләрдә мудир болуп вәзипә өтигән иқтидарлиқ маарипчи дилмурат абдуреһим, бултур роза һейттин етибарән из-дерәксиз ғайиб болған. Мухбиримизниң ғулҗа шәһиридики маарип тармақлириға қарита елип барған телефон зиярәтлири давамида, дилмурат абдуреһимниң нөвәттә ғулҗа шәһәрлик қамақханида тутуп турулуватқанлиқи ашкариланди.

Һөрмәтлик радийо аңлиғучилар, ғулҗа вәзийитидин хәвәрдар кишиләрдин бири йеқинда радийомизға учур йоллап, ғулҗа шәһәр 9-оттура мәктәпниң мудири дилмурат абдуреһимниң бултур йил оттуридин башлап из-дерики ғайиб болғанлиқини инкас қилди. Инкаста дейилишичә, дилмуратниң ғулҗа шәһәр дөңмәһәллидә олтурушлуқ аилә тавабиатлири униң ақивити һәққидә дост вә қолум-қошнилириға һечқандақ мәлумат бәрмигән. Буниңға асасән кишиләр, дилмуратниң сақчилар тәрипидин тутқун қилинғанлиқи вә аилисиниң әһвални җәмийәткә ашкарилимаслиқ һәққидә агаһландурулғанлиқини тәхмин қилишқан.

Биз дилмуратниң әһвалини ениқлаш үчүн алди билән или областлиқ маарип идарисиға телефон қилдуқ. Телефоинимизни қобул қилған хадим, дилмурат абдуреһимниң ақивити һәққидә өзиниң ениқ мәлумати йоқлуқини ейтти, әмма униң тутқунда икәнликини рәт қилмиди.

Инкас қилинишичә, дилмурат абдуреһим 1990-йили шинҗаң ониверситетиниң тарих факултитини пүттүргән болуп, у аввал ғулҗа шәһәрлик 7-оттура мәктәптә оқутқучи болған, униңдин кейин шәһәрлик 3-, 8- вә 9-оттура мәктәпләрдә мудир болуп вәзипә өтигән. Телефонимизни қобул қилған 3-оттура мәктәпниң нөвәтчи хадими, дилмурат абдуреһимниң илгири бу мәктәптә ишлигәнлики, әмма хели йиллар бурун башқа мәктәпкә йөткилип кәткәнликини баян қилди. Бу хадим дилмуратниң нөвәттә тутқунда икәнликидин хәвири барлиқини ейтти. Әмма тутулуш сәвәби вә тутуп турулуватқан орни һәққидә мәлумат бәрмиди.

Мәлум болушичә дилмурат ғулҗа шәһәрлик 8-оттура мәктәптә әң узун хизмәт қилған вә бу мәктәптә мудир чеғида қошумчә шәһәрлик маарип иадрисидиму хизмәт қилған икән. Биз 8-оттура мәктәпкә телефон қилдуқ. 8-Оттура мәктәпниң бир нөвәтчи хадими дәсләптә дилмуратниң 9-оттура мәктәпкә йүткилип кәткәнликини баян қилип, униң ақивитидин хәвири йоқлуқини ейтти. Арқидин алақидар мәсул хадимдин мәлумат сориғандин кейин, дилмуратниң ғулҗа шәһәрлик қамақханида тутуп турулуватқанлиқини ашкарилиди.

Биз униңдин дилмуратниң қачан тутулғанлиқини сориғинимизда, у дилмурат тутулған орунниң 9-оттура мәктәп икәнликини билдүрүп, бу һәқтики мәлуматларни мәзкур мәктәптин игилишимизни тәвсийә қилди. Биз униңдин дилмуратниң немә сәвәбтин тутулғанлиқини сориғинимиздиму униң 9-оттура мәктәптә тутулғанлиқини тәкитләп, бу һәқтә өзиниң мәлумати йоқлуқини ейтти.

9‏-Оттура мәктәпкә урған телефонлиримиз бағланмиғандин кейин, 8-оттура мәктәпкә қайта телефон қилип, дилмурат тутуп туруливатқан орунниң қамақхана яки лагер икәнликини сүрүштә қилдуқ. Мәсул хадим буниң “дөләт мәхпийәтлики” икәнликини әскәртип, җавап беришни қәтий һалда рәт қилди.

Инкас қилинишичә, дилмурат абдуреһим 1968-йили ғулҗа шәһәр дөңмәһәллидә туғулуп чоң болған. 30 Йиллиқ маарипчилиқ һаятида 4 оттура мәктәптә хизмәт қилип, буниң үчидә мудир болған. У өткән йили роза һейтниң иккинчи күни өйидин сиртқа чиқип кәткән пети қайтип кәлмигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт