Gollandiyede diniy zat abdulhekim mexsumhajim eslendi we Uyghurlar ittipaqliqqa chaqirildi

Uyghurlar abdulhekimxan mexsum hajim heqqide ishlen'gen filmchini körmekte. 2014-Yili 4-may. Gollandiye.

4‏-May gollandiyediki Uyghurlar jem bolup, yéqinqi zaman Uyghurlar tarixida muhim orun tutidighan diniy zat abdulhekim mexsumhajimning qisqiche tarixi, wez-nesihetliri we riyazetlik kechmishliri bilen tonutushup chiqti. Pa'aliyette yene Uyghurlar birlik we ittipaqliqqa chaqirildi.

Pa'aliyetke türkiyede turushluq doktor atawulla shayar ependi alahide teklip bilen kélip, mexsus léksiye berdi.

Atawulla shayar ependi merhum abdulhekim mexsumhajimdin telim alghan we uning ézini bésish üchün tériship élim tehsil qilip, türkiyediki melum bir uniwérsitétta mudderslik qilish sheripige érishken hedis ilmi tetqiqatchisidur.

U, ustazi abdulhekim mexsumhajimning tarixi we kechmishlirige alaqidar bilgenliri jama'etke anglatqandin kéyin, merhum heqqide ishlen'gen filimni teqdim qildi. Andin islamning heqiqitige intilip kéliwatqan pa'aliyet ehlige uniwérsal témilarda nutuq sözlidi.

Bir qisim inkaschilardin melum bolushiche, uning bekrek tekitligini pütün sherqiy türkistanliqlarning ortaq ittipaqliqi bolup, uning ittipaqliq heqqidiki alahide sherhliridin biride mundaq ipadilen'gen: ittipaqliq küch. Chünki ittipaqliq bir toplamning zichliq massisigha temsil bolup, herqandaq bir jisimning zichliqi, uning qarshisidiki jisimning zichliqidin chong bolsa, uni yéngeleydighanliqidin ibaret allaning tebi'ettiki qanuniyetlirige uyghun bir heqiqet ikenlikini “Neyze bilen qalqan” ning munasiwitige oxshitishqa bolidu.

Uning üchün bizning ittipaqliqimiz düshmenlirimizning ittipaqliqidin mustehkem we ching bolsa, düshmenni tarmar qilghili bolidu.

Doktor atawulla shayar türkiyediki “Sherqiy türkistan ma'arip jem'iyiti” ning deslepki qurghuchiliridin biri bolup, teshkilatlishish heqqidimu mol tejribe sahibi bolghan. U gollandiyege jüme küni kelgen bolup, ikki-üch künlük bu ziyaritide wetendashlirigha qimmetlik pikir-tekliplerni bergen.

Yawropa sherqiy türkistan ma'arip jem'iyiti teripidin teshkillen'gen mezkur pa'aliyet, shu yer waqti chüsh sa'et 2 yérimde bashlinip, kech sa'et 8 giche dawam qildi. Pa'aliyetke gollandiyediki mes'uliyetchan shexsler bilen “Gollandiye Uyghur birliki” teshkilatining wekillirimu qatnashti.

Pa'aliyet ehli yérim künlük didarlishish pursitide birlikte namaz qildi. Tamaqlandi we weten ichi-sirtidiki Uyghurlarning teqdirige munasiwetlik sahelerde öz-ara pikir almashturup, xushal-xuram qaytishti.

Pa'aliyet axirlashqandin kéyin ziyaritimizni qobul qilghan atawulla shayar ependi radi'o anglighuchilargha qimmetlik tewsiyilerde boldi.