Xotende hijablan'ghan we saqal qoyghanlargha 6 aydin 6 yilgha qeder qamaq we 10 ming som jerimane jazasi yolgha qoyulmaqta

Xelq'ara ehdinamiler boyiche, kishilerning diniy étiqad erkinlikige hörmet qilidighanliqi heqqide dunya jama'itige wede bergen we wediside turuwatqanliqini izchil halda tekitlep kéliwatqan xitay da'iriliri, yéqindin buyan uyghularning diniy étiqad erkinlikige qarita cheklimilirini téximu qattiq we téximu yalingach shekilde ijra qilmaqta. Ashkarilinishiche, xotende xitay da'iriliri hijaplan'ghan ayallargha 6aydin 6 yilgha qeder qamaq jazasi béridighanliqini we buningdin sirt 10 ming som jerimane qoyidighanliqini élan qilghan. Buning türtkiside xoten nahiyisining tusalla yézisida 200din artuq ayal hijaptin, 300din artuq er saqaldin ayrilghan. Yerlik da'iriler öz tewelikidiki kishiler sirtta yashawatqan bolsa, ularning saqalsiz chüshken resimini ewetip bérishini telep qilghan.

Biz anglighuchilirimizdin xotende diniy cheklimilerning esebiylerche ijra qiliniwatqanliqi heqqidiki inkaslarni tapshuruwalghandin kéyin, xoten nahiyisining tusolla yézisigha téléfon qilduq. Kent kadirliri saqal we ropashlar mesilisining sezgür bir mesile ikenlikini, bu heqtiki melumatlarni ashkarilashqa bolmaydighanliqini tekitlesh bilen birlikte, yene bir qisim melumatlarni ashkarilidi.

Melum bolushiche, bezi kentler ahalilerni bashqurushta nuqtiliq a'ililer we alahide kishiler topidin ibaret ikki guruppigha ayrip közetken we teqib astigha alghan.

Bezi kentlerde her heptide bir qétim “ Jem'iyettiki düshmen weziyitini tehlil qilish yighini ” achqan we bu yighinning xulasisige asasen diniy étiqadi mustehkem a'ililerning péyigha chüshken. Bir kent mes'ulining ashkarilishiche, nöwette xotende hijaplan'ghan ayal we saqal qoyghan erlerge qarita 6 aydin 6 yilgha qeder qamaq jazasi we buning üstige 10 ming som jerimane jazasi yolgha qoyulmaqta.

Igilishimizche, bu jaza tüzümi yéqinqi 3 ay ichide keng we qattiq halda ijra qilin'ghan. Tusolla yézisining köpinche kentliride hijablan'ghan ayal we saqalliq erler qalmighan. Melum bolushiche, tusolla yézisida yéqinqi 3 ay ichide 200din artuq ayalning hijabi we 300 ge yéqin erning saqili chüshürüwétilgen. Bu jeryanda tusolladimu köp qétimliq sürkilish we toqunushlar yüz bergen bolsimu, xitay terep selbiy weqelerni xewer qilmasliq en'enisi boyiche, bu weqelerni yoshurup kelmekte.