Gaz qachilash ponkitliridiki “Cheklesh we chektin ashqanlar”

Yéqindin buyan ixlasmenlirimizdin kéliwatqan naraziliq inkaslirigha qarighanda, xitay da'irilirining Uyghur élining her qaysi jayliridiki diniy tüste kiyin'gen yeni ropash ayallargha qaritilghan türlük cheklimiler, kemsitishler ularning türlük ijtima'iy mulazimetlerdin behrimen bolush heq-hoquqlirigha tajawuz qilish derijisige yetti. Uyghur élining bezi jayliridiki aptomobilgha gaz we may qachilash ponkitlirigha“Ropash ayallarni sélip kelgen aptomobillargha gaz qachilap bérilmeydu,ropash ayallarning gaz ponkitimizgha kirishi meniy qilinidu...” dégendek agahlandurushlar chaplap qoyulghan. Bu heqte igiligen melumatlirimizdin, gaz ponkitlirida ropash ayallar chekleshke uchrawatqan bir peytte, ijtima'iy exlaq we Uyghur milliy exlaqigha yad qilmishlarning közge chéliqishi gewdilik sélishturma hasil qiliwatqanliqi we buning Uyghurlarda küchlük naraziliq qozghawatqanliqi melum boldi.

Uyghur élining bezi jayliridiki gaz qachilash ponkitlirigha ropash ayallarning kirishini cheklesh heqqide agahlandurush chaplan'ghanliqi heqqide anglighuchilirimizdin kelgen inkasqa asasen, biz Uyghur élining oxshimighan jayliridiki aptomobilgha gaz we may qachilash ponkitlirigha téléfon qilip körduq, qeshqer sheher ichidiki bir Uyghur teripidin échilghan gaz ponkitining xadimi, bu ponkitqa undaq bir uqturush chaplanmighanliqi emma “Qalaymiqan diniy pa'aliyetler bilen shughullanmasliq heqqide agahlandurush barliqini bildürdi.

Qeshqerning poskam nahiyisidin ziyaritimizni qobul qilghan bir Uyghur ayal bolsa hazir qeshqerning hemmila yéride, hetta doxturxanilardimu shundaq agahlandurush barliqini, öziningmu yaghliq atidighanliqi, yéqindin buyan aptomobilgha gaz qachilash orunliriningmu shundaq cheklimiler arqiliq ropash ayallargha mulazimet qilishni ret qiliwatqanliqi üchün téxi alghili ikki yil bolmighan aptomobilinimu sétishqa mejbur boluwatqanliqini bildürdi :

Biz yene ürümchidiki gaz ponkitliridin mexsus ropash ayallargha qarita cheklime barliqini sorap körduq, ürümchidiki junggo tebi'iy gaz bash shirkiti gaz qachilash ponkitining bir xitay xadimi bundaq bir cheklimini anglimighanliqini bildürdi.

Ürümchi sheher ichidiki yene bir gaz qachilash ponkitining bir Uyghur xadimi ziyaritimizni qobul qilip, ürümchide ropash ayallargha qarita undaq ashkara cheklimiler yoqluqini, eksiche gaz ponkitlirigha yérim kéchilerde ésil mashinilargha olturup türlük yosunlarda yérim yalingach kiygen nazininlarning we bezilirining mest halda birlirige hemrah bolup yürüshlirining bekrek közge chéniqiwatqanliqini, ijtima'iy exlaqqa, Uyghurlarning yüz abruyi we sheher medeniyet muhitigha tesir körsitiwatqan bundaq kishilerning héchqandaq yerde cheklenmey erkin yürüshini qobul qilalmaywatqanliqini, ürümchi jem'iyitide bu xil selbiy ehwallarning yéqinqi bir ikki yilda ewj éliwatqanliqini bayan qildi.