Yaponiye Uyghur birliki tokyo otsuka meschitidiki iptardin kéyin xulase yighinni achti

19-Iyun yaponiye Uyghur birliki teshkilati tokyodiki otsuka meschitining iptarliq pa'aliyitige qatnashqan we iptardin kéyin teshkilatining xulase yighini chaqirghan.

Yaponiye Uyghur birliki teshkilatidin igilishimizche, kech sa'et yettidin on'gha qeder dawam qilghan mezkur pa'aliyetke teshkilat ezaliri, Uyghur mesilisini qollap kéliwatqan bir qisim yaponlar bilen birlikte qatnashqan. Tokyodiki qedimiy meschitlerdin biri bolghan otsuka meschitining bu iptar pa'aliyitige qatnashqanlar iptardin kéyin teshkilatning xulase yighinini chaqirghan.

Téléfon ziyaritimizni qobul qilghan yaponiye Uyghur birliki teshkilatining mu'awin re'isi ghalip mijit otsuka meschitide élip bérilghan pa'aliyet heqqide toxtaldi.

Yaponiyede élip bériliwatqan Uyghur kishilik hoquq pa'aliyetlirini izchil qollap kéliwatqan we otsuka meschitidiki pa'aliyetke qatnashqan takashi sato pa'aliyet heqqidiki tesiratini qisqiche bayan qilip: “Bügünki pa'aliyitimizde asasliqi rabiye qadir xanim bashchiliqidiki dunya Uyghur qurultiyi wekillirining yéqinda yaponiyede élip barghan ziyariti heqqide söhbet élip bérildi. Köpchilik téxi yéqindila qurulghan yaponiye Uyghur birliki teshkilatining tokyo, osaka, séndey qatarliq üch chong sheherde öz küchige tayinip ilmiy muhakime yighini chaqirghanliqigha yuqiri bahalarni berdi, shundaqla musulmanlarning iptarliq ziyapitige ishtirak qilduq. Turmuhemmet ependi otsuka meschitining jama'iti bolghanliqi üchün dawamliq yaponiye Uyghur birliki teshkilatining yighinliri bu meschitning yighin zalida chaqirilidu” dédi.

Ziyaritimizni qobul qilghan yaponiye Uyghur birliki teshkilatining re'isi doktor turmuhemmet hashim otsuka meschitide ötküzülgen xulase yighin we iptarliq pa'aliyet heqqide toxtaldi.

Rabiye qadir xanim bashchiliqidiki dunya Uyghur qurultiyi wekillirining yaponiye élip barghan pa'aliyetlirige yéqindin yardemde bolghan murakami tomoko xanim otsuka meschitide ötküzülgen iptarliq pa'aliyet heqqide qisqiche toxtilip: “Men ilgiri tokyodiki türk jamisidiki iptarliq pa'aliyetke qatnashqan idim. Bu qétim yene bir qisim yapon musulman xanim-qizliri bilen birlikte bu meschitte iptar qilish pursitige érishtim shundaqla musulmanlarning roza tutush jehettiki iradisige qayil boldum” dédi.

Doktor turmuhemmet hashim bu qétimqi yaponiye Uyghur birliki teshkilatining tokyodiki otsuka meschitide yighin chaqirish sewebliri toghrisidimu qisqiche izah bérip ötti.

Yuqiriqi awaz ulinishidin tepsilatini anglang.