"Dunya Uyghur qurultiyi wexpi" türkiyede resmiy quruldi

Ixtiyariy muxbirimiz erkin tarim
2021-03-29
Share
Türkiyede qurulghan "Dunya Uyghur qurultiyi wexpi" ning wexpe re'isi abduréshit abduxemit(aldinqi ret otturida) bashchiliqidiki qurghuchi ezaliri xatire sürette. 2021-Yili 27-mart, türkiye.
RFA/Erkin Tarim

Uyghur mesilisining xelq'aralishishigha egiship dunya Uyghur qurultiyi dunyaning her qaysiy jayliridiki pa'aliyetlirini téximu kücheytishke tirishmaqta. Bu meqset bilen 2020-yilining béshida chaqirilghan d u q ijra'iye hey'itining yighinida türkiyede "Dunya Uyghur qurultiyi wexpi" ni qurush qarari élin'ghan idi. Bir yil jeryanida barliq resmiyetler tamamlinip, mezkur wexpening qurulghanliqi türkiye resmiy gézit-metbu'atlirida élan qilindi.

3-Ayning 27-küni chüshtin kéyin istanbuldiki gre'enpark méhmanxanisida mezkur wexpening 1-nöwetlik qurghuchi hey'etler omumiy yighini chaqirilip, wexpening bashqurush hey'et ezaliri, teptish hey'etliri saylap chiqildi. Merkizi istanbuldiki "Dunya Uyghur qurultiyi wexpi" ning re'islikige abduréshit abduxemit ependi, re'is wekillikige dilshat barishchi ependi, mu'awin re'islikige erkin berdash ependi, maliye ishliri mudirliqigha memet eli hafiz ependi saylandi.

Istanbuldiki gre'enpark méhmanxanisida

Doxtur nimet qeshqerli, neshriyatchi abdujélil turan ependi we fatma er xanim mezkur wexpening teptishlikige saylandi. D u q ning mu'awin re'isi doktor erkin ekrem bilen abdujélil turan ependiler riyasetchilik qilghan mezkur yighinning axirida wexpening yéngidin saylan'ghan rehberliri bilen ezaliri özlirining telep-arzulirini otturigha qoyup ötti.

Yighin axirlashqandin kéyin d u q re'isi dolqun eysa ependi téléfon ziyaritimizni qobul qilip, mezkur wexpening rehberlik hey'itini tebriklidi. U türkiyediki Uyghur jama'itini d u q ning qarimiqida qurulghan mezkur wexpeni qollap-quwetleshke chaqirdi.

Dunya Uyghur qurultiyi wexpesini qurush teyyarliq xizmiti axirlashqandin kéyin, 2020-yili 7-ayda mezkur wexpeni qurush üchün türkiye sot idarisigha iltimas sunulghan idi. 2020-Yili 12-ayning 20-küni türkiye sot idarisi mezkur iltimasni testiqlighan. Mezkur wexpening qurulghanliqi 2021-yili 1-ayning 3-küni türkiyening döletlik gézit-metbu'atlirida resmiy élan qilin'ghan idi. Abduréshit abdulxemit ependi bu jeryanlar toghrisida radyomizgha melumat berdi.

Dunya Uyghur qurultiyi wexpening re'isi abdureshit abdulxemit ependi "Türkiyede sherqiy türkistanliqlar qurghan wexpe we teshkilatlar shunche köp turuqluq, dunya Uyghur qurultiyining bundaq bir wexpeni qurushtiki meqsiti néme?" dégen so'alimizgha jawab bérip ötti.

D u q wexpening mu'awin re'islikige saylan'ghan erkin berdash ependi "Bundin kéyin néme xizmetlerni qilmaqchisiler?" dégen so'alimigha jawab bérip, türkiyediki sherqiy türkistan ammiwiy teshkilatliri, kishilik hoquq teshkilatliri we bashqa munasiwetlik teshkilatlar hem organlar bilen qoyuq munasiwet ornitip, her jehettin masliship xizmet élip baridighanliqini tekitlidi.

Türkiyede 1985-yili qurulghan sherqiy türkistan wexpesi 1995-yili qurulghan eysa yüsüp alptékin wexpesi, 2000-yillardin kéyin qurulghan sultan satuq bughraxan wexpesi we sherqiy türkistan tetqiqat wexpesi qatarliqlar hazir aktip pa'aliyet élip barmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet