Qazaqistanliq Uyghur tenheriketchisi enwer di'as yene bir qétim dunya chémpiyoni boldi

Ixtiyariy muxbirimiz oyghan
2019.10.29
Jyu-jitsu-dunya-chempiyoni-enver-dias-2019-01.jpg Ebu-zebide ötküzülgen jyu-jitsu musabiqiside dunya chémpiyoni bolghan enwer di'as. 2019-Yili 21-aprél. Ebu-zebi, ereb birleshme xelipiliki.
RFA/Oyghan

Yéqindin buyan qazaqistanning ammiwiy axbarat wasitiliri grétsiyening krit arilida bolup ötken braziliyeche jyu-jitsu, yeni erkin chélishish we mushtlishish boyiche 14-17 yashlardiki ösmürler arisida dunya musabiqisining ötkenlikini xewer qilghanidi.

“Élorda aqparat” agéntliqi élan qilghan “Paytext tenheriketchiliri grétsiyedin médallar bilen qaytti” namliq maqalidin melum bolushiche, 24-25-öktebirde ötken mezkur musabiqige 22 memlikettin 600 ge yéqin tenheriketchi qatnashqan. Uningda qazaqistanliq yash tenheriketchiler 5 altun, 1 kümüsh we 1 mis altun'gha érishken.

“Xabar 24” agéntliqida bérilgen “Qazaqistanliq jiyu-jitsuchilar grétsiyediki dunya musabiqiside 4 altun médalgha érishti” namliq maqalide musabiqe ghalibliridin sérik aldiyar, enwer di'as, axmétjanof elixan we abzal zan'gharning ismi atilip, ularning her qaysining öz tarixigha ige ikenliki tekitlen'gen. 

Biz ötkenki programmilirimizning biride almuta wilayitining yarkent shehiride tughulup ösken enwer di'asning mushu yili aprél éyida ereb birleshme xelipiliki paytexti ebu-zebide bolup ötken braziliyeche jyu-jitsu, yeni erkin chélishish we mushtlishish boyiche dunya musabiqiside dunya chémpiyoni namigha érishkenlikini xewer qilghan iduq. Enwer di'asning öz yurtigha qaytip kelgenlikidin xewer tépip, bügün uning bilen alaqileshken iduq. U radiyomiz ziyaritini xushalliq ilkide qobul qilip, mundaq dédi: “Men üch adem bilen chélishtim. Birinchisi grétsiyening, ikkinchisi isra'iliye ning balisi boldi. Birinchi orun'gha men rusiyening balisi bilen chélishtim. Biz 55kilogramm salmaqtikiler bilen chélishtuq. Uningda on adem boldi. Birinchi orunni men, yeni qazaqistan, ikkinchisini rusiye, üchinchi orunni ruminiye bilen yene bir qazaqistanliq aldi. Qazaqistandin yette adem bérip, hemmisi médal bilen qaytti. Men yene bir qétim qazaqistanning tughini égiz kötürdüm hem buninggha xushal boldum”. 

Igilishimizche, mushu yili 20-we 26-aprél ariliqida ereb birleshme xelipilikining paytexti ebu-zebide ötken braziliyeche jyu-jitsu musabiqisige 7000 din oshuq tenheriketchi qatnashqanidi. Ular ichide Uyghur qiz-yigitlirimu bolup, adilem hoshurowa, aminem meshürowa, gülminem iminowa, yasmina roziyéwa, enwer di'aslar dunya chémpiyoni ataldi. 

Biz ene shu bir qatar chémpiyonlarni yétishtürgen almuta wilayitining panfilof nahiyesige qarashliq yarkent shehiridiki braziliyeche jyu-jitsu kulubining trénéri ilshat osmanof bilen alaqileshtuq. U ziyaritimizni qobul qilip, mundaq dédi: “Di'as bir yilning ichide üch dunya musabiqisige bérip keldi. Birinchisi, ebu-zebide birinchi orun aldi. Andin mushu yili iyunda moskwada ikkinchi orun aldi. Di'asning munchilik waqitta mundaq utuqqa érishkini her bir balining qolidin kéliwermeydu. Biz astanadiki akimiz armanjan rozaxunofning qol astida yarkentte jyu-jitsu tenherikitini rawajlandurup kéliwatimiz. Méning qol astimda hazir 150ke yéqin oqughuchi bar. Shularning ichide aldinqi qatardiki enwer di'as dep hésablaymen. Bizge hökümet tereptin yardem bolmidi. Balilargha ata-aniliri, yarkenrning hamiyliri yardem qildi. Bu qétim di'asqa jiqraq ata-anisi yardem qildi.”

Yarkent shehiride yashawatqan enwer di'asning anisi sahidem téyipowa ziyaritimizni qobul qilip, mundaq dédi: “Di'asning grétisiyege bérip altun médal élip kelgenlikige biz, ata-anisi, uruq-tughqanlirila emes, pütkül yarkent yurti xushal boldi désem bolidu. Ötkende ebu-zebige barghanda biz uningdin qattiq ensirigen iduq. Biraq shu waqitta uning birinchi orun alghinidin xushal bolup, oghlimizning chong bolup qalghanliqigha ishenduq. Grétsiyege bérip kelgendin kéyin, di'asning heqiqeten bu tenheriket türige qiziqip qalghanliqini körduq. Biz balimiz dunyagha tonulsun, élimizni, xelqimizni xushal qilsun dep tapqan-terginimizni ayimay shuninggha ishlitiwatimiz. Balimizning bu utuqi uni terbiyiligen ustazliriningmu utuqi. Men bu yerde uning trénéri ilshat osmanofqa yene bir qétim chong rexmitimni éytimen. Xelqimiz ichidin mushundaq balilar köplep chiqip, bizni xushal qiliwersun deymen.”

Melumki, tenheriketning her xil türliri boyiche qazaqistanliq Uyghurlardin köplep chémpiyonlar chiqmaqta. Mesilen, mushu yili birunéy paytexti darussalam shehiride yash ösmürler arisida chambashchiliq boyiche ötken asiya musabiqiside ilham ghapparof 70 kilogram salmaqta 2-orunni, faringiz ghopurowa bolsa, 3-orunni igiligenidi. Yene bir yash qazaqistanliq bokschi hézim izbaqi mushu yéqinda amérikada ötken musabiqide ikki mertem dunya chémpiyoni atiqigha muyesser boldi. Qazaqistanliq Uyghurlar kespiy boks boyiche yene bir perzendi dilmurat mijitoftinmu chong ümidler kütmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.