Вәнхе кийим-кечәк фабрикисиниң ғайиб ишчиси маһирә мәмәт 5 йилдин буян из-дерәксиз

Вашингтондин мухбиримиз шөһрәт һошур тәйярлиди
2023.10.25
dna-thermo-fisher.jpg Сүргүндики тибәт актиплириниң бири хитай сақчидәк(солда) ясинип бир өсмүрдин қан әвришкиси еливатқанда башқа икки тибәт актиплири ши җинпиң вә Thermo Fisher ширкитиниң башлиқи марк кәспер(Marc Casper) ниң қияпитидә ниқаблинип, кәйнидә қарап турған көрүнүш. 2023-Йили 3-феврал, һиндистан.
AP

Өткән йили иҗтимаий таратқуларда йәкән чарибағлиқ маһирә мәмәт исимлик бир қизниң маралбешидики вәнхе кийим-кечәк фабрикисиға мәҗбурий елип кетилип ғайиб болғанлиқи вә 4 йилдин буян из-дерики йоқлуқи хәвәр қилинғаниди. Мухбиримизниң бу һәқтә елип барған ениқлашлири давамида, униң та һазирғичә ғайиб икәнлики вә йеқинда DNA синиқи үчүн униң ата-анисидин қан елинғанлиқи ашкариланди.

Мәлум болушичә, уйғур елидә 2017-йилдин буян техиму кеңәйгән мәҗбурий әмгәк фабрикилири пәқәт “ишчилар” ниң җисманий вә роһий җәһәттин аста-аста хоришини кәлтүрүп чиқармастин, йәнә бәзән паҗиәлик вәқәләргиму сәһнә болмақта вә күтүлмигән вәқәләр билән кишиләрниң җениға замин болмақта. Өткән йили иҗтимаий таратқуларда чиққан бир хәвәрдә йәкән чарибағлиқ 18 яшлиқ маһирә мәмәтниң 2017-йили маралбешидики вәнхе кийим-кечәк фабрикисиға әкетилгәнлики вә бир йилдин кейин из-дерики ғайиб болғанлиқи вә ата-анисиниң 4 йилдин буян қизини издәп тапалмайватқанлиқи қәйт-қилинғаниди. Бу хәвәрдин йәнә қизниң ата-анисиниң һәрқандақ хәвп-хәтәргә тәвәккүл қилип қизини издәватқанлиқи, әмма һечқандақ нәтиҗигә еришәлмәйватқанлиқи мәлум болғаниди.

Ашкарилинишичә, маһирә мәмәт йәкән наһийәлик 2-кәспий тәрбийәләш мәктипи тәрипидин маралбешидики мәҗбурий әмгәк мәйданлиридин вәнхе кийим-кечәк фабрикисиға әвәтилгән. Бир йил ичидә 3 қетим аилисигә келип кетәлигән маһирә мәмәт 2018-йили 8-айниң 9-күнидин етибарән аилиси билән алақиси пүтүнләй үзүлгән. Аниси сәнәм сәйдәхмәт вә дадиси мәмәт турсунларниң вәнхе кийим-кечәк фабрикиси, кәспий тәрбийәләш мәктипи вә маралбеши сақчи идарисидин сүрүштә қилишлири һечқандақ нәтиҗә бәрмигән. Телефонимизни қобул қилған йәкән 2-кәспий оттура мәктәп хадими өзлири фабрикиға йолға салған оқуғучилар һәққидики соаллиримизға җаваб беришни қопаллиқ билән рәт қилди.

Илгирики ениқлашлиримизда вәнхе кийим-кечәк фабрикисидики ишчиларниң мәктәп билән фабрика арисида түзүлгән намәлум тохтам бойичә фабрикиға мәҗбурий елип келингәнлики, рухсәтсиз өйгә қайталмайдиғанлиқи вә айлиқиға 200-400 йүән мааш алидиғанлиқи ашкариланғаниди. Биз ғайиб маһирә мәмәтниң ақивити һәққидә йәкән наһийәлик маарип идарисигиму телефон қилдуқ. Бу хадимму, бу һәқтә һечқандақ йип учи бәрмиди.

Өзини ашкарилашни халимиған бир сақчи хадими, маһирә мәмәт мәсилисиниң милләтләр мунасивити мәсилисигә ятидиғанлиқи, шуңа сақчиларниң делони ениқлашта толиму еһтиятчан вә аста һәрикәт қилғанлиқи, техичә маһирә-мәмәтниң һаят-маматлиқи, һаят болса нәдә икәнлики һәққидә нәтиҗигә еришәлмигәнлики вә техи йеқинда ата-анисидин қан елинғанлиқини ашкарилиди вә маһирә мәмәтниң дадиси билән алақилишишимизни тәвсийә қилди. Биз у тәминлигән алақә номури бойичә, маһирә мәмәтниң дадиси мәмәт турсун билән алақиләштуқ. У йеқинда йезилиқ сақчиханиниң өзлиридин қан алғанлиқини, әмма делониң тәрәққияти, йәни маһирә мәмәтниң ақивити һәққидә йәнила һечқандақ мәлумат бәрмигәнликини тилға алди.

Илгири зияритимизни қобул қилған норвегийәдики сабиқ адвокат бәхтияр өмәр әпәнди, DNA синиқи үчүн ата-анисидин қан елишниң ғайиб пәрзәнтниң ақивити һәққидә яхши бир учур әмәсликини баян қилғаниди.

Юқирида, мәҗбурий әмгәк фабрикисида ғайиб болған 18 яшлиқ маһирә мәмәтниң ата-анисидин 5 йилдин кейин DNA синиқи үчүн қан елинғанлиқи һәққидә хәвәр бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.