Даңлиқ журналист мәһди һәсән илһам тохти вә уйғур мәсилисини оттуриға қойған

Мухбиримиз меһрибан
2021-10-28
Share
Даңлиқ журналист мәһди һәсән илһам тохти вә уйғур мәсилисини оттуриға қойған Журналист мәһди һәсән хитай түрмисидики уйғур зиялийси илһам тохтиниң қизи җәвһәр илһамни тор арқилиқ зиярәт қилмақта. 2021-Йили 27-өктәбир.
Mehdi Hasanning Twitter hésabatidin élin’ghan

Жорналист мәһди һәсән сиясий мәсилиләр тема қилинған “мәһди һәсән шов” намидики телевизийә чатма программиси билән тонулған. У әгәшкүчиси милйондин ашидиған даңлиқ жорналист вә программа риясәтчиси.

27-Өктәбир күни берилгән “мәһди һәсән шов” телевизийә чатма программисида, у мәхсус уйғур вәзийити вә тутқундики уйғур зиялийси илһам тохти мәсилисини оттуриға қойған.

Мәһди һәсән мәзкур программида аввал америка дөләтлик васкетбол бирләшмиси (NBA) ниң түрк маһири әнәс кантәрниң “тибәтләргә әркинлик”, “уйғурларға әркинлик” дегән темилардики хитайға қарши паалийәтлири һәққидә тохталған. У йәнә уйғур мәҗбурий әмгики ишлитилгән найке қатарлиқ тәнтәрбийә аяқлирини байқут қилиш һәркити вә найке ширкитиниң җаваби һәққидә тохталған. У нөвәттә уйғурлар мәҗбурий әмгәккә селинған һәрқандақ мәһсулатниң америка башчилиқидики ғәрб дөләтлири тәрипидин чәкләнгәнликини тәкитлигән.

Андин у хитай һөкүмитиниң уйғурларға қаратқан бастурушлири һәққидә кишилик һоқуқ тәшкилатлири елан қилған доклат вә берилгән хәвәрләрни анализ қилған.

У бу һәқтә тохтилип, милйондин артуқ уйғурниң “қайта тәрбийәләш” намида лагерларға қамилиши, уйғурларниң милләт бойичә ирқий қирғинчилиққа учраватқанлиқидәк вәзийәтниң дуняниң диққитини қозғаватқанлиқи, техи өткән һәптидила 43 дөләтниң хитай һөкүмитиниң уйғурларға қаратқан бастурушини әйиблигәнлики, хитайниң уйғурларни бастурушиға қарита вә тәдбир елиниш тәкитлиниватқанлиқи қатарлиқ әһвалларни аңлатқан.

Мәһди һәсән 27-өктәбирдики программисда йәнә тутқундики уйғур зиялийси илһам тохтиниң тутқун қилиниш сәвәби һәққидә мәхсус тохталған.

У илһам тохтиниң хитай һөкүмити тәрипидин “бөлгүнчилик” билән әйиблинип, муддәтсиз қамаққа һөкүм қилинишиға, илһам тохтиниң уйғурларниң вәзийитини дуняға аңлатқанлиқи вә уйғурларниң хитайдики баравәрлики, қануний һәқлирини тәләп қилғанлиқи сәвәп болғанлиқини билдүргән. У хитай һөкүмитиниң илһам тохтиға әркинлик бериши керәкликини тәкитлигән.

Мәһди һәсән 27-өктәбирдики “мәһди һәсән шов” программисида йәнә илһам тохтиниң америкадики қизи җәвһәр илһамниму алаһидә зиярәт қилған.

Мәһди һәсән җәвһәрдин униң 2012-йили бейҗиң айродромида дадисидин айрилип, америкаға келиш җәряни, оқуш тарихи вә униң нөвәттики уйғурлар вәзийитигә болған қаршини сориған.

Җәвһәр униң соалиға җаваб берип, америкиға кәлгәнлики үчүн өзини тәләйлик дәп һесаблайдиғанлиқи билдүргән. У өткән 8 йерим йил җәрянида һәр хил мүшкилатларни йеңип, тутқундики дадисиниң әркинлики үчүн күрәш қилғанлиқини вә ахирида бүгүнкидәк бир уйғур паалийәтчигә айланғанлиқини билдүргән.

27-Өктәбирдики “мәһди һәсән шов” программиси елан қилинғандин кейин, уйғурлар вә уйғур вәзийитигә көңүл бөлидиған кишилик һоқуқ паалийәтчилириниң юқури баһасиға еришкән.

“хәлқара кишилик һоқуқ күзүтүш тәшкилати” ниң дериктори софий ричардсон ханим, мәһди һәсәнниң бу программиси һәққидә тохтилип, бу программа “җасарәтниң намайәндиси” дегән.

Голландийәдики уйғур паалийәтчиси асийә уйғур ханимму зияритимизни қобул бу һәқтә өз қарашлирини оттуриға қойди.

У мәһди һәсәндәк бир тонулған жорналистниң милйонлиған әгәшкучиси болған “мәһди һәсән шов” программисида мәхсус уйғурларниң вәзийитини вә илһам тохтиниң әһвалини аңлитиши, уйғур мәсилисиниң хәлқаралишида муһим әһмийәткә игә, деди.

Жорналист мәһди раза һәсән 1979-йили туғулған. У өзиниң сиясий вәзийәт һәққидики анализлири билән тонулған. Униң “мәһди һәсән шов” программиси 2020-йили өктәбирдә башланған болуп, мәзкур теливизийә программисиниң әгәшкучилири милйондин ашидикән. Жорналист мәһди һәсән илгири “мәһди һәсән шов” программисида, америкадики уйғур паалийәтчилиридин америка диний әркинлик кометитиниң муавин рәиси нури түркәл әпәндини зиярәт қилип, уйғурларниң вәзийити һәққидә мәхсус программа ишлигән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт