Istanbulda “Sherqiy türkistanliqlar qérindashliq iptar pa'aliyiti” ötküzüldi

Istanbuldin ixtiyariy muxbirimiz arslan teyyarlidi
2024.03.27
istanbulda-iptar-1 Istanbulning küchükchekmeje sefaköy rayonigha jaylashqan osmanli merike zalida ötküzülgen “Sherqiy türkistanliqlar qérindashliq iptar pa'aliyiti” din körünüsh. 2024-Yili 23-mart, türkiye.
RFA/Arslan

23-Mart istanbulning küchükchekmeje sefaköy rayonigha jaylashqan osmanli merike zalida “Sherqiy türkistanliqlar qérindashliq iptar pa'aliyiti” ötküzüldi.

Bu qétimliq iptar pirogrammisigha teklip boyiche qatnashqan türkiyening siyasiy partiye rehberliri Uyghurlarni qollaydighanliqini we zulumgha qarshi küreshni dawamlashturidighanliqini tekitlidi.

Iptar pirogrammisida söz qilghan türkiye jumhuriyitining sabiq ichki ishlar ministiri we parlamént ezasi sulayman soylu aldi bilen Uyghur jama'itining ramizan éyini tebriklidi. U, mundaq dédi: “Sherqiy türkistanliqlarni öz ichige alghan musulman qérindashlirimizning qénini töküshni we ulargha zulum qilishni rawa körgenlerge qarshi hayatimizning axirighiche küresh qilishni dawam qilimiz”. 

Istanbulning küchükchekmeje sefaköy rayonigha jaylashqan osmanli merike zalida ötküzülgen “Sherqiy türkistanliqlar qérindashliq iptar pa'aliyiti” din körünüsh. 2024-Yili 23-mart, türkiye.

Teklip boyiche bu qétimliq iptar pa'aliyitige qatnashqan “Iyi” )yaxshi) partiyesining mu'awin re'isi, istanbul sheher bashliqi namzati bughra kawunji ependi mundaq dédi: “Elwette, biz sherqiy türkistanda dawamlishiwatqan zulumni her waqit küntertipte tutushqa tirishtuq, biz bu dewagha ige chiqishni hélihem dawam qilimiz, chünki sherqiy türkistan bizning jénimiz؛ sherqiy türkistan mehmud qeshqerining, osman baturning, muhemmed emin bughraning, eysa yüsüp alptékinning wetini؛ shuning üchün bizlerning uningdin waz kéchishimiz esla mumkin emes! sherqiy türkistandiki bésim we zulum axirlashqan'gha qeder, biz bu mesilini közitishtin waz kechmeymiz, u qelbimizdiki bir yaridur. Méning ejdadlirim buningdin 200 yil ilgiri silerge oxshashla perghane wadisidin chiqip bu yerge kelgen iken, biz héch waqit özbék, qazaq, Uyghur démiduq, bashqilar sorisa, biz türkistanliq déduq. Biz her waqit her yerde siler bilen birge bolimiz, allah qisqa waqit ichide u yerdiki zulumni yoq qilsun!”

Istanbulning küchükchekmeje sefaköy rayonigha jaylashqan osmanli merike zalida ötküzülgen “Sherqiy türkistanliqlar qérindashliq iptar pa'aliyiti” din körünüsh. 2024-Yili 23-mart, türkiye.

Iptarliq pa'aliyet abdujélil qarimning qur'an tilawiti bilen bashlan'ghandin kéyin, xelq'ara sherqiy türkistan teshkilatlar birlikining re'isi hidayetullah oghuzxan échilish sözi qildi. U aldi bilen türkiye hökümiti we xelqining Uyghurlargha körsetken sahibxanliqi üchün teshekkür éytidighanliqini bildürdi. U, “Muhajirettiki sherqiy türkistanliqlar istanbulda erkin yighilip iptarlishiwatqan mushu peytte, xitay sherqiy türkistanda roza tutush we bashqa barliq dini ibadetlerni cheklep, sistémiliq irqiy qirghinchiliq yürgüzüwatidu” dédi.

Arqidin sherqiy türkistan ölimalar birlikining re'isi doktor alimjan bughda söz qilip, xitayning sherqiy türkistan xelqning roza tutush qatarliq barliq ibadetlirini chekligenlikini, özining irqiy qirghinchiliq jinayitini yoshurushqa, bashqa dölet we xelqlerning közini boyashqa urunuwatqanliqini tekitlep ötti.

Istanbulning küchükchekmeje sefaköy rayonigha jaylashqan osmanli merike zalida ötküzülgen “Sherqiy türkistanliqlar qérindashliq iptar pa'aliyiti” din körünüsh. 2024-Yili 23-mart, türkiye.

Arqidin islam dunyasi ammiwi teshkilatlar birlikining bash katipi eyyub aqbal ependi söz qildi. U, “Zulum dunyaning her yéride dawamlashmaqta. Türkiye islam dunyasining chong qel'esi bolup, türkiyeni küchlendürüsh tolimu muhim. Xitay sherqiy türkistan xelqini basturushni dawam qiliwatidu. Xitayning bu jinayetlirini tosush üchün biz küchlük bolushimiz kérek” dédi.

Bügünki iptarliq pirogramma xelq'ara sherqiy türkistan teshkilatlar birlikining uyushturushi bilen ötküzülgen bolup, türkiyening hökümet, parlamént we ammiwi teshkilatlirigha wakaliten köp sanda eziz méhmanlar ishtirak qildi. Shuning bilen bir waqitta iptarliq pa'aliyitige istanbuldiki her sahe Uyghur jama'iti qatnashti.  Iptarliq pa'aliyet mezzilik Uyghur ta'amliridin kéyin sherqiy türkistan heqqidiki tesirlik du'a bilen axirlashti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.