15-Nöwetlik Uyghur yashlirini terbiyilesh kursi osloda bashlandi

Ixtiyariy muxbirimiz ekrem
2018.03.18
Oslo-15-Uyghur-Yashlirini-Terbiyelesh-kursi-01.jpg D u q ning 15-nöwetlik Uyghur yashlirini terbiyilesh kursidin bir körünüsh. 2018-Yili 17-mart. Oslo, norwégiye.
RFA/Ekrem

Dunya Uyghur qurultiyining 15-nöwetlik Uyghur yashlirini terbiyilesh kursi 17-mart norwégiyening oslo shehiridiki anker méhmanxanisida bashlandi. Kursqa norwégiyediki Uyghur yashliridin bashqa, d u q re'isi, mu'awin re'isliri, ijra'iye komitétining rehberliri we bir qisim komitétlarning mes'ullirimu qatnashti.

Bu terbiyilesh kursining muqeddimisi 16-mart chüshtin kéyin bashlan'ghan bolup, xelq'ara kechürüm teshkilati, wakaletsiz milletler teshkilati qatarliq teshkilatlarning xadimliri we kespiy mutexessisler Uyghur yashlirigha kishilik hoquq mujadilisini xelq'ara sehnilerde qandaq élip bérish heqqide ders sözligen idi. 17-Mart bolsa, aldi bilen Uyghur yashlirigha ünümlük alaqe sen'iti heqqide mutexessis pemma fox xanim emeliyetke baghlap ders ötti. 

D u q re'isi dolqun eysa ependi neq meydanda ziyaritimizni qobul qilip, 15-nöwetlik Uyghur yashlirini terbiyilesh kursi toghrisida etrapliq melumat berdi hemde bu kursining meqsiti heqqide toxtaldi.

D u q mu'awin re'isi perhat muhemmidi ependi bu kurs toghriliq ziyaritimizni qobul qilghanda, bir bölük qabiliyetlik Uyghur yashlirini yétishtürüp chiqishning muhajirettiki milliy dewaning jiddiy éhtiyaji ikenlikini tekitlidi. 

Biz kurs jeryanida ünümlük alaqe sen'itini öginiwatqan Uyghur yashlirining neq meydandiki sinaq nutuqlirini angliduq. 

Norwégiye Uyghur komitétining re'isi bextiyar ömer ependi bu kurs heqqide toxtalghanda, Uyghur yashlirining qizghinliqining nahayiti yuqiri boluwatqanliqini tilgha aldi. 

Norwégiyening oslo shehiride ötküzülgen bu qétimqi kursqa amérika, gérmaniye, türkiye, en'gliye, kanada, shwétsiye qatarliq ellerdin kelgen Uyghur yashliri we siyasiy aktiplirimu qatnashqan idi. Bu kurs 18-mart axirlishidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.