Qirghizistanda “5-Féwral ghulja weqesi” xatirilendi

“Ittipaq” jem'iyitining uyushturushi bilen ötküzülgen “5-Féwral ghulja qirghinchiliqi” xatirilesh murasimidin körünüsh. 2018-Yili 5-féwral, bishkek.

5-Féwral küni bishkek shehiri, alamédin 1-rayonining medeniyet öyide qirghizistan Uyghurliri “Ittipaq” jem'iyitining uyushturushi bilen 1997-yilidiki ghulja weqesining 21 yilliqini xatirilesh yighini bolup ötti. Yighin'gha bishkek shehiri we uning etrapidiki yéza-rayonlardin kelgen köpligen jama'et wekilliri qatnashti. Yighin'gha “Ittipaq” jem'iyitining re'isi artiq hajiyéf riyasetchilik qildi. Aldi bilen “5-Féwral ghulja qirghinchiliqi” da jénini qurban qilghan wetenperwerlerge atap qur'an tilawet qilindi.

Riyasetchi deslep doklat oqushqa pelsepe penlirining namzati we “Ittipaq” gézitining bash muherriri ekberjan bawudunofni teklip qildi. Natiq öz doklatida paji'ening bashlinish sewebliri, özlirining heq - hoquqlirini telep qilip tinchliq namayishqa chiqqan yashlarni xitay da'irilirining saqchi qisimliri qorshiwélip, oq étip qirghin qilghanliqini, netijide yüzligen kishilerning ölgenlikini we yaridar bolghanliqini shundaqla nechche minglighan yashlarning türmilerge solan'ghanliqini sözlep ötti. Natiq doklatining axirida “Ghulja 5- féwral qirghinchiliqining Uyghurlar mesilisini dunya sehnisige élip chiqishta muhim rol oynighanliqi” ni bildürdi.

Sözge chiqqan qanunchi tursun islam öz doklatida Uyghur xelqining éghir künlerni béshidin kechürüwatqanliqini eslep, bügünki xitay hökümiti yürgüzüwatqan siyasitini fashist siyaset bilen sélishturdi.

Murasimning axirida qirghizistan Uyghurliri “Ittipaq” jem'iyitining re'isi artiq hajiyéf “Bu qanliq qirghinchiliq hergiz untulmaydu, bigunah tökülgen qanlar bikar ketmeydu”, dep qirghizistan Uyghurliri namidin xitay da'irilirige naraziliq bildürdi.

Ghulja 5-féwral qanliq weqesi jalal-abad shehiridimu xatirilendi we hazir Uyghur xelqining éghir tehditlerge uchrawatqanliqi jalal-abad ahalisige tonushturuldi. Doklat bergen abdughéni ependi we jalal-abad “Ittipaq” shöbisi aqsaqallar kéngishining re'isi elishir nasiraxunoflar xitay da'irilirining chékidin ashqan teqiblesh siyasitini eyibleshti.